Asociacioni i Komunave të Kosovës i ka bërë thirrje Qeverisë së Republikës së Kosovës që ta bëjë rimbursimin e mjeteve nga falja e 100 eurove për Tatimin në Pronë, shkruan Fol Drejt.
Në një reagim për media AKK ia ka kujtuar opinionit publik se krejt kjo erdhi si rrjedhojë e ndryshimit të Projekt Ligjit për plotësimin e ndryshimit të Tatimit në Pronë.
“Siç dihet tashmë në Komisionin Parlamentar për Buxhet dhe Financa të Kuvendit të Kosovës ka kaluar Projekt Ligji për plotësim ndryshimin e Tatimit në Pronë me anë të së cilit është propozuar edhe falja e 100 eurove të para nga tatimi në pronë i qytetarëve të Republikës së Kosovës:
Poashtu ju informojmë se as si Komuna e as si Asociacion i Komunave të Kosovës nuk jemi konsultuar për këtë propozim dhe as për ndikimet që do ti ketë ky Ligj në buxhetet komunale dhe realizimin e projekteve të tyre kapitale.”
Sipas AKK, nuk janë marrë fare parasysh specifikat e Komunave e ku kjo do të afektoj sidomos komunat e vogla kur të hyrë kryesore kanë të hyrat vetanake nga tatimi në pronë.
“Nga analizat tona mund të konkludohet se nga një veprim i tillë komunat mund t’i kenë për 40% më të ulta të hyrat vetanake për vitin 2023 sesa është paraparë nga projeksionet buxhetore. Bordi i Asociacionit të Komunave të Kosovës kërkon nga ju që me Projektligjin për Tatimin në pronë, krahas faljes se 100 eurove të vendoset që rimbursimin e kësaj shume ta mbuloj niveli qendror në mënyrë që të mos varfërohen Komunat e Kosovës dhe të mos ketë ndikimin në realizimin e projekteve kapitale të parapara me buxhetet komunale të këtij viti”, thuhet në njoftim.
“Të nderuar anëtar të Kryesisë së Kuvendit, shpresojmë që kjo do të jetë hera e fundit që komunat nuk konsultohen për ligje të cilat kanë një impakt të drejtpërdrejtë në funksionimin e pushtetit lokal në Republikën e Kosovës” – mbyllet njoftimi./FolDrejt/
