Hysni Gucati është liruar nga Gjykata Speciale në Hagë, shkruan Fol Drejt.
Lirimi i ish kreut të Organizatës së Veteranëve të Luftës së Ushtrisë Çlirimtare të Kosovës (OVL – UÇK), është konfirmuar nga vetë gjykata.
“Më 12 tetor 2023, Kryetarja e Dhomave të Specializuara të Kosovës (DHSK), gjykatëse Ekaterina Trendafilova, vendosi të modifikojë dënimin e z. Hysni Gucati për lirimin e tij më 18 tetor 2023 ose rreth kësaj date, me kushtet e përcaktuara në vendim. Këto kushte do të jenë në fuqi gjatë pjesës së mbetur të dënimit të dhënë nga Paneli i Gjykatës së Apelit, konkretisht për pjesën e mbetur të dënimit me katër vjet e tre muaj”, thuhet në vendim.
Sipas vendimit “kryetarja ka marrë parasysh se megjithëse veprat penale për të cilat Gucati është dënuar janë padyshim të rënda, duke marrë parasysh efektin mjaft negativ të zbulimit të informacionit konfidencial mbi dëshmitarë (të mundshëm), ishin disa faktorë që peshuan në favor të modifikimit të dënimit të tij”.
Sipas gjykatës, Gucati që nga arrestimi e deri më tani, pati mundësi të reflektonte mbi veprimet e veta, dhe me kalimin e kohës ndryshuan edhe sjelljet e tij.
“Kryetarja theksoi shprehjet e pendesës së z. Gucati, në veçanti, veçanërisht faljen, gjatë seancës gojore, që ai shprehimisht u kërkoi të gjithë atyre që mund të ishin ndier të kërcënuar nga veprimet e tij. Gjithashtu Kryetarja, vuri në dukje zotimin e vendosur të z. Gucati se nuk do të përfshihej në veprime të tjera që mund të karakterizoheshin si vepra penale kundër administrimit të drejtësisë dhe se do t’i përmbushë të gjithë kushtet e përcaktuara për lirimin e tij.”
Vendimi, sipas njoftimit të gjykatës, do të anulohet, në rast se Gucati nuk do t’i përfill disa prej kushteve./FolDrejt/
