Presidenti i Koresë së Jugut, Yoon Suk-yeol, ka urdhëruar ushtrinë e vendit që “të ndëshkojë me shpejtësi dhe me vendosmëri” Korenë e Veriut nëse ajo kryen ndonjë provokim.
Agjencia e lajmeve ‘Yonhap’ raporton se duke folur me komandantët e tij ushtarak të Ushtrisë, Marinës, Forcave Ajrore dhe Trupave Detare, presidentin Yoon tha se misioni i ushtrisë është të mbrojë vendin e saj, shkruan AA, transmeton Fol Drejt.
“Presidenti urdhëroi ushtrinë tonë që të ndëshkojë me shpejtësi dhe vendosmëri Korenë e Veriut në rast se ajo kryen një provokim”, tha Yonhap, duke u bazuar në një deklaratë të lëshuar nga zyra e presidentit pasi Yoon kryesoi takimin e parë me komandantët e lartë që nga marrja e detyrës në muajin maj.
Që nga viti i kaluar, tensionet janë rritur në Gadishullin Korean pasi Seuli dhe Pheaniani kanë shtuar stërvitjet për të treguar fuqinë ushtarake.
Muajin e kaluar, SHBA-ja, Koreja e Jugut dhe Japonia njoftuan planet për të forcuar lidhjet e sigurisë dhe ranë dakord që bashkërisht të kundërshtojnë kërcënimet nga Koreja e Veriut nëse ajo kryen një tjetër test bërthamor.
SHBA-ja dhe Koreja e Jugut i ofruan disa oferta për dialog Koresë së Veriut për të lehtësuar tensionet aktuale në Gadishullin Korean, por Koreja e Veriut nuk iu përgjigj ofertës.
Më 27 maj, Kina dhe Rusia vendosën veton ndaj sanksioneve të reja të Këshillit të Sigurimit të Kombeve të Bashkuara (OKB) që do të ishin vendosur ndaj Koresë së Veriut në hakmarrje për testet e vazhdueshme të raketave balistike, të cilat ajo i kryen në kundërshtim me rezolutat e mëparshme të Këshillit të Sigurimit të OKB-së./FolDrejt/