Energjia elektrike ka arritur rekorde të reja historike.
Çmimi për 1 megavat orë në bursën hungareze u shit me 500 euro këtë të martë në periudhë normale, ndërsa në pik vlera arriti në 600 euro për megavat orë. (grafik)
Të hënën, gjatë orëve 17:00 deri në 20:00, ku është dhe konsumi më i lartë i energjisë, çmimi arriti 710 euro.
Korporatës Elektroenergjike i ka kushtuar 10 milion euro fatura për sigurimin e importeve të energjisë këtë javë, ndërsa ka reduktuar ndjeshëm energjinë e blerë nga jashtë duke përdorur më shumë prodhimin nga kaskada e Drinit.
Aktualisht, afro 70% e nevojave po plotësohet me energjinë e prodhuar në vend.
KESH ka blerë 14.300 megavat orë me çmimin 493 euro dhe 4.700 megavat për 431 euro.
Kjo është vlera më e lartë që Shqipëria ka paguar për çmimin e energjisë.
Niveli i Fierzës ka rënë me 2 metra gjatë javës së fundit, ndërsa rezerva hidrike gjatë verës është reduktuar me 30%, duke arritur në 870 gigavat orë.
Një javë më parë Ministria e Financave i kaloi Korporatës Elektroenergjetike fondin me vlerë 160 milion për të siguruar energjinë për muajt e verës, ndërsa detyrimet që kompania kishte për importet e qershorit kishin mbetur pa shlyer. /Euronews.al
