Ministria e Punëve të Jashtme dhe Diasporës bën të ditur se marrëveshja rreth njohjes së patentë shoferëve mes Kosovës dhe Hungarisë është në fazën fillestare.
Nga kjo ministri kanë treguar se janë duke punuar për caktimin e negociatave të para.
“Marrëveshja për njohje të ndërsjellë të patentë shoferëve mes Republikës së Kosovës dhe asaj të Hungarisë, është ende në fazën fillestare. Rekomandimi për këtë nismë është bërë më 22 gusht 2022. Aktualisht është duke u punuar në caktimin e raundit të parë të negociatave për njohjen e ndërsjellë të patentë shoferëve mes Republikës së Kosovës dhe Republikës së Hungarisë”, thuhet në përgjigjen për MPJD-së.
“Dakordimi për hapjen e negociatave është një hap i rëndësishëm në thellimin e marrëdhënieve të shkëlqyera mes dy shteteve mike, me synimin për t’jua lehtësuar jetën shtetasve të Republikës së Kosovës që jetojnë dhe punojnë në Republikën e Hungarisë. Po ashtu vendimi për hapjen e negociatave për njohjen e ndërsjellë të patentë shoferëve, mes dy shteteve, i shërben edhe shtetasve hungarezë me prejardhje nga Republika e Kosovës”.
“Lidhur me arritjen e marrëveshjes për njohjen e ndërsjellë të patentë-shoferëve vazhdimisht janë duke punuar zyrtarët e lartë të divizionit për Traktate dhe Marrëveshje Ndërkombëtare të Ministrisë së Punëve të Jashtme dhe Diasporës”.
MPJD-ja, mes tjerash, tregon se në sa shtete njihen patentë shoferët e kosovarëve dhe anasjelltas, njofton Klankosova.tv.
“Procesi i njohjes së patentë shoferëve ndryshon varësisht nga legjislacioni i shteteve me të cilat Republika e Kosovës hyn në negociata. Për momentin marrëveshje të nënshkruara dhe në fuqi, për njohjen e patentë shoferëve, Republika e Kosovës i ka të nënshkruara me Republikën e Maqedonisë së Veriut, Republikën e Shqipërisë dhe me Republikën Federale të Gjermanisë”.
Por, sa zgjatë procedura e njohjes së patentë shoferëve?
“Çdo shtet, me të cilin Republika e Kosovës hyn në bisedime për njohjen e ndërsjellë të patentë shoferëve i ka procedurat e brendshme specifike, të bazuara në legjislacionin në fuqi. Duhet theksuar se përveç procedurave të brendshme, që duhet ndjekur nga të dyja palët në negociata, rol të veçantë tek procedura deri në njohje të patentë shoferëve luan edhe rrjedha e negociatave mes dy shteteve. Këtu duhet theksuar kërkesat që mund t’i ketë për shembull Republika e Hungarisë kundrejt Republikës së Kosovës apo kërkesat që mund të vijnë nga shteti i Kosovës drejt atij të Hungarisë”, është përgjigja e Ministrisë së Jashtme.
“Ndërsa sa i përket zgjatjes së procesit që çon deri tek njohja e patentë shoferëve nuk mund të specifikojmë ndonjë afat konkret, ngase procesi varet nga rrjedha e bisedimeve mes shteteve”, thuhet në përgjigje.
Të mërkurën e javës së kaluar Qeveria e Kosovës mbajti mbledhjen e 96-të ku u bë e ditur kjo nismë, teksa ministri i Brendshëm, Xhelal Sveçla, në mbledhje tha se kjo projekt-marrëveshje ka për qëllim lehtësimin e qarkullimit rrugor tek të dyja vendit, njofton Klankosova.tv.
“Më lejoni para jush të propozoj nismën e marrëveshjes mes Qeverisë së Kosovës dhe Hungarisë për njohjen reciproke e patentë-shoferëve. Kjo projekt-marrëveshje ka për qëllim lehetësimin e qarkullimit rrugor tek të dyja palët. Marrëveshja ka kaluar të gjitha hapat procedural të parashikuar me ligjin për marrëveshjet ndërkombëtare”, tha Sveçla.
