Deputeti i Bundestagut gjerman, Thomas Hacker, ka deklaruar se është e drejtë që presidenca çeke në Këshillin e Bashkimit Evropian është duke iu përkushtuar temës së liberalizimit të vizave për Kosovën.
“Megjithatë, Komisioni nuk duhet të çojë në diskutime të mëtejshme, të pafundme. Kosova e ka merituar liberalizimin e vizave shumë kohë më parë”, ka shkruar Hacker në rrjetin social Facebook.
Çështja e liberalizimit të vizave për Kosovën do të jetë në rend të ditës në takimin e grupit punues të Këshillit Evropian, më 13 tetor, konfirmojnë burimet diplomatike të BE-së në Bruksel.
Presidenca çeke e BE-së tashmë u ka dërguar letër vendeve anëtare si paralajmërim për diskutimet për këtë temë.
