Në korrik të këtij viti, kryeministri në detyrë i Bullgarisë, Stefan Yanev kishte deklaruar se Qeveria bullgare do të merrte vendim se cilit shtet do t’i dhuronte një sasi vaksinash anti-COVID, të cilave së shpejti do tu skadonte afati.
Sipas raportimeve të medieve të huaja, deri në korrik, Bullgaria kishte pranuar 4.8 milionë doza të vaksinës, por i kishte administruar vetëm 1.8 milionë.
Siç sqaroi një ditë më parë ministri i Shëndetësisë, Arben Vitia, pikërisht për shkak të afatit të afërt të skadencës, në korrik të këtij viti janë refuzuar disa donacione nga vendet e BE-së.
Sipas ministrit Vitia, donacionet janë refuzuar për shkak se afati i skadencës nuk ishte i mjaftueshëm për të garantuar se do të mund të shfrytëzoheshin për t’i vaksinuar qytetarët.
Ndryshe, Vitia në një konferencë për media ka bërë të ditur se janë hequr nga administrimi mbi 133 mijë vaksina AstraZeneca pas skadimit të afatit, vaksina këto të cilat ishin donacion nga Norvegjia.
Ministri shtoi se ka pasur shumë dezinformata përfshirë këtu edhe nga deputetë të Kuvendit për afatin e këtyre vaksinave.
Vitia shtoi se vaksinat që janë në stoqe tona janë vaksina të sigurta.
“Ju siguroj se aktualisht kemi mjaftueshëm vaksina dhe nuk do të lejojmë që stoqet tona të mbesin pa to asnjë moment. Presim në fund të kësaj jave ose në fillim të javës tjetër 150 mijë vaksina nga Gjermania dhe në javën e tretë të shtatorit edhe 100 mijë vaksina nga Italia. Edhe këto vaksina janë AstraZeneca me afat deri në nëntor të këtij viti”, ka thënë Vitia.
Ai shtoi se në fillim të javës tjetër pritet të vijnë edhe pjesa tjetër e vaksinave Pfizer përmes COVAX nga donacioni i SHBA-ve prej 500 mijë dozave, dhe mbi 200 mijë doza nga kontrata bilaterale që kemi me Pfizer.
Ministri shtoi se ekipet e vaksinimit do të intensifikojnë punën edhe gjatë vikendit filluar nga java e ardhshme.