Kryetari i PDK-së, Memli Krasniqi, në Ditën Ndërkombëtare të Infermierisë ka kujtuar kontributin nënës së tij dhe të gjithë infermierëve ndër vite, shkruan Fol Drejt.
“Nëna ime Edibja, tash e 45 vjet është në shërbim të qytetarëve të vendit si infermiere. Një kontribut i gjatë dhe jo pak i lodhshëm, por që unë e di se po të kishte mundësi – ajo do ta bënte përsëri nga dita e parë. Dhe për këtë, për dy arsye: E para, sepse ky është profesioni i infermierit: një jetë në shërbim të tjerëve – posaçërisht atyre që kanë më shumë nevojë. Shumë punë, sakrificë e mund për ta bërë tjetrin të ndjehet më mirë. Dhe, e dyta, sepse kështu janë nënat tona shqiptare. Plot pasion, zemër dhe empati.”, shkroi Krasniqi në Facebook.
Krasniqi tha se sot, në Ditën Ndërkombëtare të Infermierëve, dëshiron që të urojë dhe falënderojë jo vetëm nënën e tij, por të gjithë infermierët e Kosovës, vijën e parë të kujdesit shëndetësor, të cilët japin shpirtin për të na mbajtur të sigurt dhe të shëndetshëm.
“Përkushtimi, dhembshuria dhe profesionalizmi juaj bëjnë një ndryshim të jashtëzakonshëm në jetën tonë si individë, në familjet tona dhe në shtetin tonë. Prandaj, faleminderit për gjithçka që jeni dhe gjithçka që bëni.
Natyrisht, krahas këtij falënderimi, është obligim i yni, e, posaçërisht i Qeverisë, që të angazhohet për krijimin e kushteve sa më dinjitoze për infermierët tanë. Kosova nuk ka infermierë për shtetet tjera. Ato dhe ata na duhen në Kosovë, që vullnetin dhe profesionalizimin e tyre ta dhurojnë tek njerëzit tanë. Nuk ndjehet askush më keq sesa infermierët kur nuk mund t’i ofrojnë një shërbim një pacienti në mungesë të pajisjeve ose ilaçeve – siç, fatkeqësisht, po ndodh akoma në Kosovë.”, shtoi tutje Krasniqi. /FolDrejt/
