Mediat nga Beogradi raportojnë se Presidenti i Serbisë Aleksandër Vuçiq ka thënë se refuzon të shkojë në Bruksel, përderisa Qeveria e Kosovës nuk e jetëson “marrëveshjen” për Asociacionin. Në anën tjetër Kryeministri Albin Kurti dje në parlament tha se, nuk do të ketë marrëveshje, pa njohjen reciproke në qendër, shkruan Fol Drejt.
Asnjë prehje në përpjekjet diplomatike të diplomatëve perëndimorë me synimin për të “përfunduar” marrëveshjen ndërmjet Beogradit dhe Prishtinës deri në fund të vitit. Me këtë synim, përfaqësuesi evropian për politikë të jashtme, Josep Borel, pret që pas disa javësh të presë në Bruksel presidentin Vuçiq dhe kryeministrin Kurti. Por Presidenti i Serbisë Aleksandër Vuçiq, sipas opozitares N1info, i është përgjigjur se nuk dëshiron të shkojë në Bruksel si turist, para se t’i dorëzohet Asociacioni i Komunave Serbe.
Vuçiq së fundmi është takuar me ambasadorët e pesë vendeve në OSBE-së dhe përfaqësuesve të Shteteve të Bashkuara të Amerikës (ShBA), Britanisë së Madhe, Gjermanisë, Francës dhe Italisë në Serbi.
“Më pyetën se çfarë mendojnë për Kosovën? Unë iu thashë se çfarë mendoj për Kosovën dhe kështu me radhë…”
Dhe teksa po përmblidhte përshtypjet e tij nga takimi me përfaqësuesit e Kuintit, raportohet si i ka shkuar ftesa nga Brukseli.
“Propozimi është në tavolinë. Unë do t’i ftoj dy liderët të kthehen në Bruksel pas disa javësh për ta shtyrë përfundimisht atë propozim”, ka thënë përfaqësuesi i lartë i Bashkimit Evropian për Politikën e Jashtme, Josep Borrell.
“Nëse mendoni se po më thërrisni në Bruksel për të më bindur, ju them se pa e ditur se çfarë po ndodh me Bashkimin e Komunave Serbe, mos më telefononi… Ju më quani turist, por kjo nuk më intereson, kam qenë 200 herë në Bruksel. Ju lutem më njoftoni kur ta dorëzojnë Bashkimin e Komunave Serbe. Kur ta dorëzojnë, do të vij të flas për gjithçka tjetër” – citohet të ketë thënë Vuçiq.
Në anën tjetër Kryeministri i Republikës së Kosovës Albin Kurti tha se “ajo çka i duhet Kosovës është njohja reciproke dhe marrëveshje finale pa njohje reciproke në qendër nuk do të ketë!”
Sipas njohësve të zhvillimeve politike në vend, nuk ka ndonjë garanci të fortë që Serbia do ta njoh Kosovën, nëse kjo e fundit e implementon marrëveshjen për Asociacionin.
Analisti Shkëlzen Gashi në një debat në emisionin Pressing tha kushtet e Kosovës karshi Serbisë, janë me vend:
“Une menoj që ky i ka qit kushtet shumë mirë. Njohjen reciproke, kur të ka njohje reciproke, ua bajmë juve Asociacionin, qysh e thotë Pakoja e Ahtisarit, jo qysh e thotë marrëveshja 2013/ 2015, pa e shkelë Kushtetutën e Republikës së Kosovës, edhe qato të drejta duhet me i pas edhe minoritetet në shtetin e Serbisë” – ka thënë ai, duke sqaruar se “pak a shumë ky është thelbi i kushteve” të vendosura nga pala e Kosovës.
Sipas tij, meqë “ky është projekt i dëmshëm për Kosovën”, subjektet politike, shoqëria civile, gazetarët etj, duhet ta kundërshtojnë fuqishëm “jo për Albin Kurtin”, por për Republikën, sepse ky është interes nacional./FolDrejt/
