Ditë më parë në opinionin publik u ngrit shqetësimi se Policia e Kosovës nuk është e pajisur mirë me armatim, municione dhe pajisje të tjera përcjellëse. Megjithatë, duket që të gjitha këto kanë qenë spekulime dashakeqëse, në një kohë kur tensionet në veri po shihen si rrezik për një destabilizim të mëtejmë të situatës.
Nga Imer Topanica – Fol Drejt
“Policia e Kosovës është e furnizuar shumë mirë me pajisje përcjellëse, jelekë anti-plumb dhe municione” – tha një burim i brendshëm i qeverisë për Fol Drejt. Zyrtarë Policorë nga terreni, po ashtu e konfirmuan se “para një jave” janë furnizuar me jelekë të rinj antiplumb, ndërsa me municione para një muaji.
“Policia furnizohet vazhdimisht në bazë të kërkesave dhe nevojave të veta operacionale” – tha një tjetër burim nga Ministria e Punëve të Brendshme (MPB), duke e forcuar edhe më tej argumentin, se:
“…dhe me gjithçka që i nevojitet, që ta kryejë detyrën e saj!”
Sipas këtyre burimeve pretendimet se policët kanë ngelur pa pajisje bazë (uniforma, armatim dhe municione), janë tërësisht të paqëndrueshme.
Po ashtu, sipas të gjeturave të Fol Drejt, për sa u përket uniformave, disa procedura tenderuese për furnizim me këpucë dhe përgjithësisht uniforma për zyrtarët policorë, veç janë hapur. Përmbyllja e këtyre procedurave mund të marrin pak kohë, por lajmi i mirë është që policëve nuk do t’iu mungojë asgjë në këtë drejtim.
Në anën tjetër incidentet e mbrëmshme në veri të vendit, po përcillen me shqetësim të madh në opinionin publik. Siç u raportua mbrëmë, disa grupe të maskuara kanë demoluar Zyrat e Komisionit Zgjedhor në disa zona të Zubin Potokut dhe Mitrovicës së Veriut, po përcillen me shqetësim.
“Me këtë rast, Policia e Kosovës njofton opinionin publik në lidhje me zhvillimet e sigurisë në veri të vendit se, më datë 6 dhjetor 2022, në komunat Zubin Potok dhe Mitrovicë Veri, Njësitë policore të rendit publik kanë shoqëruar zyrtarët e Komisionit Komunal zgjedhor në zyrat e komisionit komunal zgjedhor, të cilat ndodhen në komunat Zubin Potok e Mitrovicë Veri me qëllim të kryerjes së detyrave dhe kompetencave të tyre ligjore.
Në orët e para të pasdites të së martës në disa zona të Zubin Potok-ut dhe Mitrovicës Veri janë regjistruar disa incidente (dyshohet shkrepje armësh e shpërthime), por deri në këto momente nuk janë raportuar lëndime nga këto incidente, përderisa raportohet se protestuesit kanë demoluar zyrat e komisionit komunal zgjedhor”, konfirmoi incidentet policia.
Ato janë dënuar nga komuniteti ndërkombëtar në Kosovë, duke bërë thirrje që rendi dhe qetësia t’i lë hapësirë dialogut.
Të gjitha këto po ndodhin në një kontekst zhvillimesh diplomatike, ndërsa Bashkimi Evropian (BE), i përkrahur edhe nga Shtetet e Bashkuara të Amerikës (ShBA), po përpiqet ta mbyll një herë e mirë kapitullin për Ballkanin Perëndimor.
Agjencia e lajmeve Rojters dje në një artikull që iu kushtua zhvillimeve të Samitit të Tiranës, shkruante se po bëhet përpjekje që të dy palët të arrinin marrëveshje përfundimtare për më pak se një vit.
Për sa u përket incidenteve të fundit në veri, Beogradi zyrtar është përpjekur të iu jap konotacion anti-serbëve në Kosovë. Presidenti i Serbisë Aleksandar Vuçiq, duke i komentuar zhvillimet tha se “policia u dërgua sërish në veri” nga Kosova, duke e dëshmuar me këtë mosrespektimin e Marrëveshjes së Brukselit.
“Ju thjesht pyesni veten se cilën ditë do të ndodhë ndonjë provokim i ri, i cili mund të prishë stabilitetin dhe paqen” – duke pretenduar se rreziku vjen nga pala e shqiptarëve të Kosovës dhe jo nga serbët e dirigjuar nga vetë ai.
Por deklaratat e tilla që vijnë nga fqinji verior, janë hedhur poshtë në mënyrë të vazhdueshme nga Prishtina zyrtare. Kryeministri i Republikës së Kosovës Albin Kurti:
“Bandat kriminale kanë intensifikuar sulmet në veri të Kosovës. Ato e dinë se po ju vije fundi. Qeveria e Kosovës as s’bën pazare me to dhe as s’i duron ato. Bombat që hedhin, plumbat që shkrepin dhe maskat që vendosin janë pafuqia e tyre politike e popullore.”
Për fat të mirë, këto incidente kaluan pa pasoja në njerëz. Nëpërmjet një postimi në llogarinë e tij në Twitter, Shefi i EULEX-it Lars-Gunnar Wigemark, ka thënë se janë duke e monitoruar situatën, duke theksuar se ky monitorim do të kryhet në koordinim të ngushtë me KFOR-in dhe Policinë e Kosovës. Kjo e fundit, siç e vumë në dukje më sipër, është e përgatitur edhe moralisht, edhe fizikisht por edhe materialisht./FolDrejt/
