Kroacia ka nisur operacionin e dërgimit të 14 helikopterëve transportues në Ukrainë – 12 helikopterë MI 8 MTV-1 dhe dy helikopterë MI 8 T.
Sipas informacioneve të disponueshme, aktualisht në ambientet e Qendrës Teknike të Aviacionit në Goricë të Madhe ndodhen disa helikopterë, ku punonjësit po bëjnë të gjitha përgatitjet e nevojshme teknike, përcjell Fol Drejt.
Ndër të tjera, nga helikopteri hiqen të gjitha shenjat ekzistuese, nëse është e nevojshme, zëvendësohet materiali i konsumuar dhe mbushet vaji. Për shkak të mungesës së hapësirës në Goricë të Madhe, helikopterët e mbetur janë të vendosur në pjesën ushtarake të aeroportit Pleso.
Vlerësimet janë se helikopterët do të jenë gati për transport për rreth dhjetë ditë. Shtatë helikopterë do të çmontohen pjesërisht dhe do të transportohen nga toka në Poloni, ndërsa shtatë të tjerët do të fluturojnë në të njëjtin vend, nga ku do të transferohen në Ukrainë.
Qeveria kroate ka vendosur një shenjë sekrete në të gjitha informacionet për ndihmën ushtarake për Ukrainën, ndaj është e pamundur të merret konfirmimi zyrtar i këtij informacioni. Dhurimin e 14 helikopterëve transportues e ka konfirmuar kryeministri Plenkoviq në nëntor të vitit të kaluar, por pa detaje të tjera.
Nga ana tjetër, presidenti kroat Zoran Milanoviq është zemëruar nga fakti se qeveria po aranzhon dhurimin e helikopterëve dhe ka thënë se Ministria e Mbrojtjes nuk i ka sqaruar se si do të ndërrohen.
“Ata vendosën t’ia japin Ukrainës, le t’ia japin.” Ata e dinë shumë mirë se cilat janë nevojat e ushtrisë ukrainase, cilat janë nevojat e ushtrisë kroate, ata e dinë shumë mirë, por nuk u intereson”, tha Milanović./FolDrejt/
