Kryeministri i Republikës së Kosovës, Albin Kurti, ka përmendur vendimet që mori Qeveria që ai udhëheq gjatë vitit 2022, vendime këto të lidhura me mirëqenien e qytetarëve, transmeton Fol Drejt.
Më anë të një postimi në facebook, kryeministri Kurti ka përmendur shtesat për 30 mijë lehona dhe 260 mijë fëmijë.
Kurti gjithashtu ka përmendur edhe ndarjen e dy pakove për ringjallje ekonomike, duke mbështetur kështu 800 mijë qytetarë të Republikës së Kosovës.
Në postimin e tij, kryeministri nuk ka lënë pa përmendur as skemën e punësimit “Qeveria për Familjet”, e që sipas kryeministrit mundësoi punësimin e 770 punëtorëve.
Kurti gjithashtu përmendi edhe subvencionimin e bërë në fushën e energjetikës përmes tarifave të energjisë elektrike, faturave të energjisë elektrike për kursimtarët dhe blerjen e pajisjeve efiçiente për ngrohje për mbi 8 mijë familje.
Postimi i plotë i kryeministri Kurti:
“2022: Qeveria për rritje të mirëqenies
Mbështetje e vazhdueshme për qytetarët gjatë vitit që porsa lamë pas.
Ndamë shtesa për 30 mijë lehona dhe për 260 mijë fëmijë.
Brenda një viti, me dy Pako mbështetëm drejtpërdrejt rreth 800 mijë qytetarë të Republikës, pothuajse secilën famije.
1) Pako për Ringjallje Ekonomike
100 milionë euro
Dyfishuam asistencën sociale për rreth 26 mijë familje në muajin prill.
Ndamë nga 100 euro për rreth:
– 300 mijë pensionmarrës;
– 240 mijë punëtorë të sektorit privat;
– 74 mijë punëtorë të sektorit publik;
– 50 mijë studentë.
Shpërndamë afër 37 mijë pako ushqimore për familjet në nevojë.
2) Pako për përballje me Inflacion 150 milionë euro
Dyfishuam asistencën sociale për mbi 24 mijë familje në muajin shtator.
Ndamë nga 100 euro shtesë për rreth:
– 290 mijë pensionmarrës;
– 12 mijë punëtorë të ndërmarrjeve publike;
– 51 mijë studentë.
Për 76 mijë punëtorët e sektorit publik ndamë nga 50 euro shtesë (shtator – dhjetor). Subvencionuam 50% të rritjes së pagës për punëtorët e sektorit privat për 3 muaj.
Me skemën e punësimit “Qeveria për Familjet”, u punësuan 770 punëtorë.
Me masën 1.3 u punësuan afër 5000 gra e vajza. Është rihapur thirrja për biznese për mbështetje të 50% të pagës për 3 muajt e parë nëse punësojnë gra.
Në vitin për personat me aftësi të kufizuara: u punësuan 239 persona (119 burra dhe 120 gra).
Subvencionuam:
– Tarifat e energjisë elektrike për të gjithë qytetarët e bizneset që nga shkurti 2022;
– Faturat e energjisë elektrike për kursimtarët (mbi 200 mijë përfitues);
– Blerjen e pajisjeve efiçente për ngrohje për mbi 8 mijë familje.”/FolDrejt/
