Me rastin e festës kombëtare, ambasada çeke në Kosovë organizoi një pritje ku i ftuar ishte dhe Kryeministri i Republikës së Kosovës, Albin Kurti, transmeton Fol Drejt.
Në fjalën e tij, Kryeministri Kurti shprehu urimet për Republikën e Çekisë, duke theksuar se kjo datë na kujton dhe vlerat që bashkojnë njerëzit dhe vendet tona.
“Jam i lumtur të përmend se disa ditë më parë të dy vendet tona ngritën nivelet përkatëse të përfaqësimit në atë më të lartë, të ambasadorëve me të drejta të plota. Kjo arritje është një dëshmi e marrëdhënieve tona të shkëlqyera, të ndërtuara mbi angazhimin tonë të përbashkët për demokracinë, të drejtat e njeriut, sundimin e ligjit dhe sigurinë e qytetarëve tanë.” shtoi Kryeministri Kurti.
Më tej, ai përmendi e përkujtoi dhe autorë e dijetarë të mirënjohur çek, si Milan Kundera, Vaclav Havel e Karel Havliček.
Në përfundim, shprehu bindjen e tij se “Partneriteti ndërmjet Republikës së Kosovës dhe Republikës së Çekisë do të vazhdojë të lulëzojë edhe në vitet në vijim.”
Më poshtë, fjala e plotë e Kryeministrit Kurti:
I nderuari Ambasador i Republikës Çeke, z. Mazanek,
Të nderuar përfaqësues të institucioneve, deputetë, ministra të Qeverisë,
Presidenti Sejdiu,
Shkëlqesi, zonja dhe zotërinj,
Është nder të flas para jush sot, me rastin e ditës së themelimit të Çekosllovakisë së pavarur më 1918.
105 vjet më parë, Tomas Masaryk shpalli pavarësinë e Çekosllovakisë bazuar në “idealet e demokracisë moderne”. Ajo demokraci u ndërpre, fillimisht nga nazistët dhe më pas nga komunistët, përmes errësirës së gjatë të pushtimit sovjetik. Megjithatë, Republika Çeke, një komb në zemër të Evropës, rezistoi me sukses dhe në fund ngulmoi në ndjekjen e saj për liri, pavarësi dhe demokraci.
Ndërsa jemi mbledhur sot për të shënuar një moment historik të rëndësishëm në historinë e shtetit çekosllovak, kjo datë e përkujtuar na kujton vlerat që bashkojnë njerëzit dhe vendet tona. Në dritën e kësaj, jam i lumtur të përmend se disa ditë më parë të dy vendet tona ngritën nivelet tona përkatëse të përfaqësimit në nivelin më të lartë të ambasadorëve me të drejta të plota.
Kjo arritje është një dëshmi e marrëdhënieve tona të shkëlqyera, të ndërtuara mbi angazhimin tonë të përbashkët për demokracinë, të drejtat e njeriut, sundimin e ligjit dhe sigurinë e qytetarëve tanë.
Ky angazhim dhe uniteti ynë janë edhe më të rëndësishëm sot, në një botë plot pasiguri, në të cilën rrezikohet rendi ndërkombëtar dhe parimet bazë të së drejtës ndërkombëtare.
Në këto kohë është thelbësore që ne të qëndrojmë së bashku për të mbrojtur vlerat tona të përbashkëta dhe për të forcuar bashkëpunimin tonë në të gjitha fushat me interes të përbashkët.
Republika Çeke ishte ndër të parat që e njohu pavarësinë e Kosovës në vitin 2008 dhe në vazhdimësi e ka mbështetur vendin tonë në shtetndërtimin, paqen, sigurinë dhe integrimin euroatlantik, për çka ne i jemi përjetësisht mirënjohës.
Pikërisht gjatë Presidencës Çeke të Këshillit të Bashkimit Evropian arritëm t’i japim fund një procesi të zgjatur të liberalizimit të vizave për Kosovën. Kjo arritje ishte kryesisht për shkak të përkushtimit dhe vizionit strategjik të qeverisë çeke për të ardhmen e Bashkimit Evropian.
Dhe pikërisht Presidencës Çeke të BE-së ia besuam aplikimin e Kosovës për anëtarësim në Bashkimin Evropian, duke shënuar kështu një hap historik drejt anëtarësimit tonë në Bashkimin Evropian.
Unë personalisht e kam njohur Çekosllovakinë përmes filmave. “Lehtësia e padurueshme e qenies”, filmin e Philip Kaufman-it që të gjithë e njohim shumë mirë me Juliette Binoche, Lena Olin dhe Daniel Day-Lewis dhe përmes kësaj njoha Milan Kunderën, i cili fatkeqësisht u nda nga jeta verën e kaluar. Dhe përmes Milan Kunderës njoha Jan Patoçkën, Kartën 77 dhe Vaclav Havel, gjithashtu një shkrimtar i jashtëzakonshëm 180 vjet më parë, i quajtur Karel Havliček. Unë e konsideroj atë një nga shkrimtarët më të mirë për të mësuar historinë.
Të nderuar, Shkëlqesia Juaj Ambasador Mazanek,
Më vjen mirë që shoh bashkëpunimin tonë dypalësh dhe shumëpalësh të nxitur përmes rritjes së lidhjeve diplomatike, ekonomike dhe ndërmjet njerëzve.
Dëshiroj të shpreh besimin tim të fortë se partneriteti ndërmjet Republikës së Kosovës dhe Republikës Çeke do të vazhdojë të lulëzojë edhe në vitet në vijim. Mezi presim të vazhdojmë të bashkëpunojmë ngushtë me qeverinë e Republikës Çeke për t’i afruar edhe më shumë dy vendet tona.
Všechno nejlepší! Na zdraví! urime!/FolDrejt/
