Kryeministri, Albin Kurti, është pyetur nëse ka frikë se Kosova rrezikohet nga ndonjë konflikt nga pala serbe, ngjashëm siç ndodhi me Ukrainën nga pala ruse, pas kërkesës për t’u anëtarësuar në NATO.
Në intervistën për CNN, kryeministri Kurti u shpreh se nuk ndjehet i frikësuar, megjithatë thotë se në situatë të tillë duhet treguar të kujdesshëm, përcjell Klan Kosova.
”Ne nuk jemi të frikësuar. Por në të njëjtën kohë ne duhet të jemi të kujdesshëm. Megjithatë ne jemi të shqetësuar se ata mund të zgjasin konfliktin. Nuk jemi të frikësuar për shkak të aleatëve tanë, veçanërisht SHBA-së, Gjermanisë…”
Kurti tha se Serbia e do paratë europiane, armët ruse e investimin kinez, por theksoi se Kosova nuk është frikësuar për shkak të partnerëve të saj në NATO, veçanërisht SHBA-së, Gjermanisë e të tjerëve.
Ndërsa kur u pyet se a është Kosova e përgatitur në rast të acarimit të situatës, kryeministri Kurti tha se janë duke e rritur kapacitetin ushtarak dhe bashkëpunimin me vendet anëtare të NATO-s.
