Me mall dhe krenari po përkujtohet të rënët e familjes Jasharaj. Këtë e ka thënë edhe Kryeministri i Kosovës Albin Kurti, me rastin e vizitës në Prekaz, vend ky të cilin e ka cilësuar si “Kryeqyteti i Kryengritjes Shqiptare”, shkruan Fol Drejt.
Ai ia ka atribuuar meritat e mëdha familjes Jashari, duke thënë se duhet ta dimë se kujt ia kemi borxh këtë liri.
“Ne kthehemi e rikthehemi në kryeqytetin e kryengritjes shqiptare në Prekaz për ta kujtuar e përkujtuar Epopenë e UÇK-së, e cila i dha hovin vendimtar UÇK-së dhe më pas mundësoi çlirimin dhe lirimin e vendit tonë. Sot, ndërtojmë institucione demokratike, bëjmë zhvillim ekonomike pa e harruar se kujt ia kemi borxh këtë liri, e këtë mundësi që të ecim përpara”, deklaroi Kurti pas homazheve në Kompleksin Memorial “Adem Jashari”.
Ai ua kujtoi të gjithëve se para 25 vitesh, “të udhëhequr nga kryekomandanti Adem Jashari ranë heroikisht gjithsej 59 veta”.
59 anëtarë të familjes Jashari, në mesin e tyre fëmijë, gra, pleq dhe disa mysafirë, ranë heroikisht në një luftë të pabarabartë me forcat serbe, të cilët përdorën arsenal të rëndë armësh, kundër kësaj familjeje./FolDrejt/
