Kryeministri i Kosovës Albin Kurti, i cili po merr pjesë në Forumin Ekonomik të Vjenës, së fundi ka thënë që Kosova po e përjeton një “bum” ekonomik ndërsa ka theksuar se “ekonomia jonë në rritje është 10.7 %”. Në këtë kontekst zhvillimesh, zërat për rritje pagash në sektorët publik e privat, janë shtuar, raporton Fol Drejt.
Njohësit e zhvillimeve ekonomike thonë se rritja e pagave është një nevojë urgjente. E gjitha do të ndihmonte në rritje të konsumit, prodhimit dhe krijimin e vendeve të reja të punës.
Ditë më parë, Kryetari i Odës Ekonomike të Kosovës Lulzim Rafuna, i cili vlerëson se çdo rritje e pagës, shton konsumin dhe prodhimin në vend, për Radio Kosovën tha se kjo rekomandohet edhe nga Fondi Monetar Ndërkombëtar (FMN):
“Duhet të lëvizë edhe sektori publik dhe ka rekomandime dhe nga FMN që t’i rrisë pagat, përveç kësaj e ka obligim ligjor. Nuk është gjendja e keqe në sektorin privat ashtu siç paraqitet, flas brenda mundësive në një situatë të jashtëzakonshme siç jemi. E rëndësishme është se sektori privat ka lëvizur dhe do të lëvizë tutje. Në rast se paraqitet nevojë për prodhim, atëherë sektori privat ka nevojë për punëtorë dhe atyre që veç janë duhet t’ua rrisë pagat.”
Të një mendimi janë edhe nga Aleanca Kosovare e Bizneseve. Sipas tyre rritja e pagave duhet të bëhet me urgjencë.
Megjithatë nga Qeveria e Kosovës nuk kanë bërë të ditur nëse thirrjeve të vazhdueshme për rritje pagash, do t’u përgjigjen pozitivisht, ndërsa Ligji i ri për Pagat është ende larg miratimit. Ministri i Financave Hekuran Murati javë më parë nëpërmjet një postimi bëri thirrje që “bizneset t’i rrisin pagat e punëtorëve”, pa lënë të nënkuptohet që qeveria do ta bëjë të njëjtin veprim. Në një konferencë për media para disa ditësh, ai tha se:
“Sa i përket sektorit privat, çka kemi dashur të bëjmë si qeveri, ka qenë që të sigurohemi se ka një rritje permanente të pagave në sektorin publik… Pra, t’i mbështesim punëdhënësit që t’u rriten pagat në mënyrë permanente. Sepse ne si qeveri kemi dhënë një mbështetje, por ajo ka qenë një mujore. Pra, në sektorin privat rritja e pagave duhet të vij nga punëdhënësi. Dhe këtë punëdhënësit kanë hapësirë, ne këtë e shohim nga niveli i qarkullimit edhe nga mbledhja e tatimit në fitimin e korporatave. Fitimi i korporatave është më i lartë se që ka qenë ndonjë herë, pra ka hapësirë që në sektorin privat kompanitë t’i rrisin pagat. Dhe ne si qeveri do të insistojmë në këtë.”
“Ministër, pagat duhet të rriten me ligj e veprime konkrete jo me fjalë goje! Përkundra që bizneset nuk paguajnë as 5-10% të taksave ndajë shtetit ato dhe në sezonat e dimrit po ulin pagat punëtorëve ndërsa çmimet kanë rritë nga 30-100% brenda vitit!? Është absolutisht absurde të thuhet ‘ngritjani’ pagat punëtorëve e ndërsa dyshemen e pagës e keni lanë 250€, ndërsa inflacioni ka arrit afër 30% në 2 vitet e fundit në produktet bazë” – i ka komentuar njëri nga ndjekësit e tij. Shumë të tjerë, ndërkaq, e kanë cilësuar si “hajgare” thirrjen.
Përndryshe çmimet në Kosovë kanë shënuar rritje nga muaji në muaj. Sipas Agjencisë së Statistikave (ASK), vetëm nga muaji shtator në muajin tetor është shënuar 0.9% inflacion, ndërsa kjo shifër konsiderohet e trefishuar nga periudha e pandemisë e këndej.
Perimet janë rritur mbi 8%, lëndët djegëse 3.5%, karburante 3% e të tjera. Ndërsa përqindje marramendëse janë krahasuar tetorin e vitit 2021 më këtë të 2022, ku lëndët djegëse kanë shënuar ngitje 56%, vajra ushqimore mbi 40%, buka e drithërat 30%, qumësht e produkte të qumështit dhe vezë 27% ndërsa karburantet 20%./FolDrejt/
