Kryeministri i Republikës së Kosovës, Albin Kurti, mori sot pjesë në ceremoninë e diplomimit të studentëve R.I.T Kosova, Klasa e vitit 2023, transmeton Fol Drejt.
Në hapjen e kësaj ceremonie, Kryeministri Kurti, tha se ka kënaqësinë që është i pranishëm dhe që së bashku po e ndajnë gëzimin e kësaj arritjeje të rëndësishme për secilin prej tyre.
Para studentëve, ai tha se ka mbetur pak kohë deri sa t’i keni në duar diplomat tuaja, e ju e dini se diploma me të cilën do të pajiseni sot ka shumë vlerë. Sipas tij, diploma është një dëshmi fizike e rezultatit të punës suaj akademike në këto katër vite. Njëkohësisht, përfaqëson edhe këmbënguljen tuaj për t’i tejkaluar sfidat me të cilat jeni ballafaquar gjatë këtij rrugëtimi.
Duke folur për sfidat dhe vështirësitë me të cilat janë ballafaquar studentët, siç ishte ajo me Pandeminë Covid-19, kryeministri Kurti, u shpreh se sfida e ballafaqimit me pandeminë na ka bërë të kuptojmë, që jetën nuk duhet ta shohim si një trajektore të pandryshueshme.
Gjatë fjalës së tij në këtë ceremoni diplomimi, kryeministri Kurti, inkurajoi studentët e pranishëm që asnjëherë të mos e nënvlerësojnë peshën e vendimeve të tyre, cilat do që të jenë ato. “Duke punuar me integritet dhe përgjegjësi, jam i bindur se do të jeni të suksesshëm nga do që shkoni, çka do që bëni”, tha ai.
Në fund të fjalës së tij, kryeministri Kurti, duke i uruar për këtë arritje kaq të madhe iu drejtua studentëve me fjalët se vendimet që ju do të merrni – të mëdha apo të vogla – kanë potencialin që të kenë ndikim zinxhiror në shoqëri dhe të prekin jetën e shumë individëve.
Të pranishëm në këtë ceremoni ishin edhe Kryetarja e Bordit të R.I.T Kosova, Nancy Bekavac, si dhe presidenti njëherësh dhe dekan në R.I.T Kosova, z. Kamal Shahrabi.
Fjala e plotë e kryeministrit Kurti:
E nderuara zonja Nancy Bekavac, Kryetare e Bordit të R.I.T Kosova,
I nderuari z. Kamal Shahrabi, President dhe dekan i R.I.T Kosova të Universitetit Amerikan në Kosovë,
I nderuari staf akademik,
Të nderuara zonja dhe zotërinj,
Të nderuar të pranishëm,
Të dashur studentë të RIT Kosova,
Kam kënaqësinë që jam sot me juve, e që po e ndajmë bashkë gëzimin e kësaj arritje të rëndësishme për secilin prej jush. Mund të imagjinoj se si sot ndiheni më të qetë se ç’jeni ndjerë për një kohë të gjatë. I keni përfunduar provimet e projektet finale, e nuk keni më nevojë të përllogaritni mesataren e notave tuaja. Ka mbetur pak fare kohë deri sa t’i keni në duar tuaja diplomat, e ju e dini se diploma me të cilën pajiseni sot ka shumë vlerë.
Ajo është një dëshmi fizike konkrete e rezultatit të punës suaj akademike në këto katër vite. Njëkohësisht, ajo përfaqëson edhe këmbënguljen tuaj për t’i tejkaluar sfidat me të cilat ju jeni ballafaquar gjatë këtij rrugëtimi.
Ndryshe nga gjeneratat e mëparshme, ju jeni ballafaquar me një sfidë të re e të paparashikuar nga asnjëri prej nesh. Pandemia Covid-19 na detyroi që të përshtatemi me një mënyrë të re të jetesës, e kjo nuk e përjashtoi edhe sistemin tonë të edukimit.
Gjatë viteve tuaja të studimit u detyruat të adaptoheni me një mënyrë të re të mësimnxënies, ku klasat u zëvendësuan me ekrane kompjuterësh, e diskutimet u bartën në rrafshin virtual. Megjithëkëtë, qoftë në kampus të universitetit, apo përmes platformës Zoom, nuk ju ka munguar zelli që të angazhoheni në aktivitete të rëndësishme të jetës studentore, duke krijuar miqësi e duke marrë nisma për të mirën e komunitetit tuaj, efekti i të cilave do të vijojë të ndjehet edhe nga gjeneratat e ardhshme.
Sfida e ballafaqimit me pandeminë na ka mësuar që jetën nuk duhet ta shohim si një trajektore të pandryshueshme. E ardhmja sigurisht që ka shumë të panjohura, megjithatë janë vlerat e njohura ato që do t’ju përcjellin në çka do që vendosni të veproni e të krijoni në vijim. Kurrë mos e nënvlerësoni peshën e vendimeve tuaja, cilat do që të jenë ato. Duke punuar me integritet dhe përgjegjësi, jam i bindur se do të jeni të suksesshëm ngado që shkoni, çka do që bëni.
Përderisa po e filloni rrugëtimin tuaj të ri në botën profesionale, nuk duhet të harroni edhe përgjegjësinë që keni si pjesë e shoqërisë. Ne japim kontribut në shoqëri, sepse marrim mundësi dhe fitojmë të drejta prej saj. Mbase dikujt mund të mos i ketë pëlqyer puna në ekip që u është dashur ta bëni shumë shpesh gjatë studimeve – jo të gjithë kanë stilin e njëjtë të punës dhe kjo ndonjëherë krijon vështirësi. Ky lloj bashkëpunimi është po aq i rëndësishëm edhe në botën profesionale. Vetëm kur i bashkoni aftësitë tuaja individuale, mund të zbatoni ide që ofrojnë zgjidhje për sfidat e shoqërisë dhe të kohës sonë. Dhe teksa punoni vazhdoni të studioni, ashtu sikurse që i rrituri duhet të mirëmbajë diçka prej kureshtjes fëmijërore për jetë, ngjashëm edhe ndërmarrësi, punëtori a zyrtari duhet të mirëmbajë diçka prej kërkimit shkencor e kritik të ditëve studentore përgjithmonë.
Vendimet që ju do të merrni – të mëdha apo të vogla – kanë potencialin që të kenë ndikim zinxhiror në shoqëri dhe të prekin jetën e shumë individëve të tjerë. Pavarësisht nëse vendosni të ofroni kontributin tuaj në sektorin publik apo atë privat, veprimet tuaja mund të frymëzojnë të tjerët, të nxisin inovacion, të shtyjnë përpara progresin dhe të ndihmojnë në krijimin e një shoqërie më të drejtë e më gjithëpërfshirëse.
Gjenerata 2023, urime për këtë arritje kaq të madhe!
