Kryeministri i Republikës së Kosovës Albin Kurti u është kundërpërgjigjur kritikave të opozitës, në seancën e ftuar enkas për këtë punë, shkruan Fol Drejt.
Ai ka thënë se i është dashur të përpiqet ta çojë procesin nga mosnjohja reciproke, në njohje reciproke:
“Nga mosnjohja reciproke, duhet të kalojmë në njohje reciproke! Ata e kanë dëgjuar Serbinë duke thënë që nuk e njeh Kosovën, por e kanë dëgjuar edhe Kosovën duke thënë se nuk e njeh Serbinë.”
Duke iu referuar fjalimit të Abdixhikut, Kurti tha se ai nuk e ka lexuar siç duhet dokumentin e marrëveshjes:
“Dhe këtu nëse e vëreni në fjalinë e katër të preambulës thuhet: duke i përfshirë çështjet, jo çështja siç tha deputeti Abdixhiku… Pse? Sepse qysh në takimin e parë kur kam qenë në Bruksel me Presidentin Vuçiq te zyra e Borrelit, në mes të qershorit të vitit 2021 unë kam thënë: Republika e Kosovës, nuk e njeh Serbinë!”
Ai e ka shpjeguar edhe njëherë pozicionin e qeverisë duke thënë se:
”Nuk do të lejoja të negocioja asgjë që nuk është në përputhje me kushtetutën, asnjë nga kjo, asnjëherë”.
Por sipas tij “gabimet politike, historike të qeverive të kaluara nuk do të përsëriten asnjëherë. Do të bëjë maskimalen që ato gabime t’i eliminojë apo së paku t’i reduktoj”.
Ai po ashtu ka shpeguar se cila është pika më diskutabile e marrëveshjes:
“Është neni 10 i marrëveshjes, fjalia e fundit. Përmban normën që të gjitha marrëveshjet e Brukselit duhen zbatuar. Këtë duhet ta kuptoni si një detyrim ndaj tërësisë dhe paqartësisë që e shoqëron në tërësi e jo si diçka të veçantë ndaj një elementi të një marrëveshje, natyrisht e kam fjalën për marrëveshjen Thaçi-Daçiq të 19 prillit 2013 e të ratifikuar në këtë Kuvend e të zgjeruar me marrëveshjen Mustafa-Vuçiq më 25 gusht 2015 mbi Asociacionin. Pra, marrëveshja bazë nuk i veçon elementet, por i vendos ato në një normë të tipit kategori”, u shpreh mes tjerash kryeministri./FoLDrejt/
