Në seancën e 28 shtatorit në Kuvendin Komunal në Lipjan, kryetari i kësaj komune, Imri Ahmeti, ka përdorur një gjuhë e cila është cilësuar si bullizuese e kërcënuese ndaj asambleistes së Lëvizjes Vetëvendosje (LV), Dije Bikliqi Dragaçina, shkruan Fol Drejt.
Kryetari Imri Ahmeti, dëgjohet në një audio-incizim duke u shprehur me gjuhë denigruese, bullizuese dhe kërcënuese ndaj Dije Bikliqit Dragaçinas. Ndër të tjera, i pari i komunës e kërcënon asambleisten e LVV-së se sa të jetë ai aty kryetar komune, ajo mund të konkuroj çdo ditë për konkurse sesionesh në qytetin e saj, mirëpo ai nuk do ta lejoj të pranohet.
“Langa, langa, langa, langa. Imlia, Imlia, Imlia, Imlia. E po t’kallxoj ty çike. Imlia, Imlia, Imlia, Imlia. E ngom, a e kryte. E pra s’do t’kesh fatin kurrë të jesh në sesion komune sa të jem unë këtu, kurrë! Konkuro përditë, apliko përditë”, dëgjohet duke thënë kryetari i Lipjanit, Imri Ahmeti, teksa vazhdon t’i fyej edhe asambleistët e tjerë të LV-së në seancë me gjuhë të ulët.
Për këtë ka reaguar asambleistja e LV-së. Ky është shkrimi i plotë i asambleistes, Dije Bikliqi Dragaçina:
Qytetarë të dashur të Lipjanit e sidomos ju që e keni votuar, dëgjojeni me vëmendje kryetarin Imri Ahmeti i cili na doli tani të jetë edhe shantazhues e kërcënues së pari ndaj një gruaje dhe nëne së dyti ndaj një qytetare e së treti ndaj një anëtare të Kuvendit Komunal!
Në seancën e djeshme të Kuvendit Komunal të Lipjanit, Kryeyari i Komunës, Imri Ahmeti, më reagon në mënyrë primitive, duke më bullizuar. Në këtë audio (se Lipjani nuk e transmeton seancën) mund ta dëgjoni se deri ku mund të shkojë.
Po ashtu, përpiqej të më intimidonte e shantazhonte se gjoja unë vite më parë pasna aplikuar në një konkurs të Komunës. Aplikimi në konkurse është e drejtë e qytetarëve, por deklarimi publik i Imri Ahmetit se ky nuk më ka pranu dhe se sa të është ky kurrë nuk do të punësohem, është vepër penale. Për këtë e ftoj prokurorinë t’i marrë regjistrimet e seancës së fundit dhe ta intervistojë atë.
Kjo shpërfaq një kryetar që mundohet ta përdor një të drejtë të secilit qytetarë, atë të punësimit, për të më demotivuar dhe duke u munduar të ma ndaloj kritikën time ndaj punës së tij, ndaj keqmenaxhimit të tij e të keqpërdorimit të tij. Dhe për më tepër e pranon publikisht që është “Ai” që vendos e ka vendos edhe në të kakuarën se kush duhet të punësohet në Komunë e kush jo, thuajse ky institucion është pronë e tij private, zaten edhe ashtu sillet gjatë gjithë kohës. Dhe në fund sigurisht që organet kompetente duhet të angazhohen për këtë pjesë që ka elemente të veprës penale, pasi kryetari e pranon publikisht që prej kur ka ardhur në krye të komunës shumë të rinj e të reja e secili qytetar sikurse unë që ka aplikuar për punë vetëm është poshtëruar, malltretuar e çka jo tjetër derisa personi muaj përpara ka qenë i zgjedhur që do të punësohet tashmë, madje emrat kanë dalë prej zyrtarëve të LDK-së, dhe konkurset kanë qenë vetëm sa për ta plotësuar numrin e aplikantëve. Nga krejt kjo përballje e imja në këtë mbledhje me krejt ata burra që lëshonin zëra “shuj aty ti” duhet me kanë tepër karakter i fortë për me i përballu.
E kemi thënë vazhdimisht Imri Ahmeti është kryetar komune, i zgjedhur politikisht, ai mund të emërojë veç drejtorët e tij, por jo edhe shërbyesit civil që do të duhej me konkurs. Ne të gjithë e dimë që edhe për punësimin e mirëmbajtësve të shkollave, lista fillimisht shkon te Imriu, dhe zakonisht për të punësuar familjarët e tij e të kabinetit të tij, por me deklarimin publik ai po e konfirmon e po konsumon vepër penale.
E ne asambleistët e LVV-së jemi këtu për ta shpërfaqur fytyren e tij të vërtetë, siç nuk e njohin në publik. E do të vazhdojmë ta shpërfaqim përditë e edhe më shumë.
Mirëpo përplasja nuk ka ndalur me kaq. Sipas Imri Ahmetit “inati” i asambleistes së Dije Bikiliqi Dragacina ndërlidhet me një histori të hershme, që ka të bëjë me një vend pune, të cilën kjo nuk ka arritur ta fitojë.
Mirëpo për këtë asambleistja e Vetëvendosjes, po ashtu e ka një përgjigje:
“Imri Ahmeti paska reagu sot, duke e përdorë gjuhën e vetme që njeh: atë të shpifjes. Pra, përveç bullizues, edhe gënjeshtar e shpifës. Në vend të kërkimfaljes, ky sot po e bën gabimin e dytë e po e ia rëndon vetës përgjegjësinë ligjore e penale duke u munduar ti ikë gabimit që ka bërë publikisht se ai është që vendos e ka vendos se kush duhet të punësohet e kush jo. Asnjëherë nuk kam dashur të jem pjesë e listës për asamble të LDK-së, por ajo që është më thelbësorja, ASNJËHERË nuk kam aplikuar për zëdhënëse të Komunës sepse ky është post politik e ske nevojë me apliku fare. Por kam aplikuar për Zyrtare për informim, që është pozitë administrative e shërbimit civil në Komunë. Për këtë janë faktet e ftoj edhe kryetarin ti publikoj ato. Madje edhe vet ky e përmend në seancë, datën e konkursit dhe se e ka pranu një person tjetër. (Dëgjojeni edhe Audio inqizimin). Prandaj po i shoh të gjitha mundësitë ligjore që t’u drejtohem organeve për shpifje e për vepër penale.
Është koha që qytetarët e Lipjanit ta shohin fytyrën reale të Imri Ahmetit. Diskriminimi duhet të çrrënjoset njëherë e mirë. Sikurse ai gjinor, ashtu edhe ai partiak. Komuna është e të gjithëve e për të gjithë.”
Nuk dihet nëse kjo përplasje do të përfundojë në gjyq, por siç kuptohet nga reagimi i asambleistes, ajo po i shikon të gjitha mundësitë për t’iu drejtuar organeve gjyqësore “për shpifje e vepër penale.”/FolDrejt/
