Veriu i vendit ka kaluar nëpër një valë tensionesh, tash e disa javë, shkruan Fol Drejt.
Privimi i kryetarëve të zgjedhur të katër komunave veriore nga ushtrimi i detyrës në zyrat e komunës, prej protestuesve serbë, mbrojtja me forcë e objekteve të komunës nga ana e Policisë së Kosovës dhe pjesëtarëve të KFOR-it, rrëmbimi i tre policëve kosovarë nga njësitë speciale serbe brenda kufirit të Kosovës, bllokimi i mallrave me origjinë nga Serbia, gjetja e një sasie të konsiderueshme të armatimit, janë vetëm disa nga rastet e panoramës së ngjarjeve të javëve të fundit.
Prej të dyja palëve është kërkuar depërshkallëzim urgjent të situatës, por gjërat nuk është se kanë lëvizur për të mirë.
Një përpjekje për ta kthyer situatën në binarët e vetë, ishte edhe takimi i fundit në Bruksel prej të cilit buruan tri kushte për Kosovën, përkatësisht, Kryeministrin Albin Kurti.
I deleguari special i Bashkimit Evropian për Kosovën, Miroslav Lajçak deklaroi se “de-përshkallëzimi i situatës, zgjedhjet e reja në veri të Kosovës, dhe kthimi në Marrëveshjen e Ohrit, janë tri kërkesat e BE-së të cilat u janë prezantuar Kurtit, dhe Vuçiqit, me 22 qershor në Bruksel.”
Shefi për Diplomaci të Jashtme i BE-së Josep Borrel, ndërkaq ka qenë edhe më i ashpër në kritika ndaj Kosovës. Ndonëse për palën kosovare përshkallëzimi i situatës dhe ndërprerja e bisedimeve ka ardhur si rrjedhojë e qasjes së vetë Serbisë, në sytë e bashkësisë ndërkombëtare, Kosova është parë po aq fajtore sa edhe Serbia.
“Ajo që kemi parë është denigrimi dhe ndëshkimi i partnerit tonë demokratik [Kosova], ndërsa një vend gjithnjë e më autokratik [Serbia] është pritur me hov dhe nuk ka pasur ndonjë pasojë, pavarësisht faktit se ata kanë arrestuar apo rrëmbyer tre zyrtarë të Policisë së Kosovës. Mungesa e vullnetit të vendeve dhe organizatave si BE për ta quajtur arrestim të paligjshëm, për të njohur se ka ndodhur një rrëmbim apo për të ndëshkuar [Serbinë], është e pafalshme”, ka thënë politikania britanike e Partisë Konservatore dhe kryetarja e Komitetit për Çështjet e Jashtme në Dhomën e Përfaqësuesve, Alicia Kearns për Inside Albania.
Po aq kritik ndaj qasjes së Shteteve të Bashkuara të Amerikës (ShBA) dhe BE-së ka qenë edhe kongresisti amerikan Ritchie Torres. Po për Inside Albania Torres ka thënë se nëse në Kosovë ka më shumë dashuri për ShBA-të sesa në vetë ShBA-në, “Pse do ta hidhnim poshtë këtë mirëkuptim?”
Ai ka vijuar duke thënë se:
“Prioriteti më i lartë duhet të jetë sigurimi i njohjes së Kosovës si shtet i pavarur dhe integrimi i Kosovës së pari në Bashkimin Evropian dhe NATO e në fund të fundit në bashkësinë ndërkombëtare. Kjo duhet të mbetet politika e Evropës dhe e Shteteve të Bashkuara.”
Qeveria e Kosovës ka përdorur gjithë instrumentet për ta dekriminalizuar zonën më të errët të saj, çerdhe e grupeve kriminale serbe, të cilat janë duke e luajtur rolin kryesor në tensionet e kohëve të fundit. Policia e Kosovës, ndonëse ka arritur që t’i arrestojë disa prej figurave kryesore të këtyre grupeve kriminale dhe konfiskimin e një sasie armatimi, nuk është lavdëruar nga bashkësia ndërkombëtare për këto veprime.
Ndërkaq, tre policët e marrë peng në Serbi, dhe bllokimi i 70 milionë eurove në kufijtë e Kosovës, tregojnë që procesi ka ngelur në një vend./FolDrejt/
