Zëvendëskryeministri Besnik Bislimi është duke raportuar para Komisionit për Integrim Evropian, shkruan Fol Drejt.
Çështja e dialogut, liberalizimi i vizave, integrimet evropiane etj, janë në agjendë të diskutimit.
Ndër të tjera ai është pyetur edhe për liberalizimin e vizave. Ai ka thënë se procesi i liberalizimit të vizave për Kosovën nuk ka pasur kurrfarë ndërlidhje me procesin e dialogut.
“Procesi i liberalizimit të vizave është lidhur me futjen në zbatim të sistemit të ETIAS që është sistem i regjistrimit të udhëtimeve nga vendet të cilat kanë regjim të udhëtimit pa viza drejt vendeve që janë anëtare të shëngenit. Propozimi i BE-së i grupit punues ka qenë që kosovarët të udhëtojnë pa viza që nga dita e parë kur fillon të zbatohet ETIAS, por meqë ka pasur pasiguri se a do të mund të zbatohet ETIAS nga data 1 nëntor është kërkuar futja e një date tjetër në rast se BE-ja vonohet me ETIAS, atëherë qytetarët është paraparë të lëvizin që nga data 1 dhjetor të vitit të ardhshëm. Ka pasur ndërhyrje të Spanjës që ka kërkuar që 1 dhjetor të zhvendoset më 1 janar në mënyrë që udhëtimi pa viza të mos ndodhë gjatë presidencës spanjolle”.
Sipas tij, shtyrja e afatit për diskutim, është bërë për të mirën e vendit. Sipas tij teksti sot vendoset në votim jo në diskutim, “votohet si pika A e agjendës që nuk diskutohet fare, por votohet, nëse s’është votuar ende, pritet sot rreth orës 4 e gjysmë, kjo pastaj e hap rrugën për votim në Këshill me datë 9 ose 10 dhjetor. S’ka pasur kurrfarë ndërlidhje me procesin e dialogut, arsyeja pse nuk është diskutuar javën e kaluar por këtë javë, ka të bëjë me brengën e disa vendeve që mbase ndonjë vend skeptik mund ta keqpërdor situatën me targa për të dhënë diskutime negative, vendimi për shtyrje ka qenë me qëllim të mirë për Kosovën.”/FolDrejt/
