Me titullin përmbledhës “Kurrë mos harro”, në Zagreb të Kroacisë janë promovuar libra për gjenocidin serb kundër shqiptarëve në trojet dhe vendin e tyre. Me rastim e Ditës së Flamurit Kombëtar, promovimi është organizuar dhe mbështetur nga Shoqata e Grave Shqiptare të Zagrebit “Drita” me kryetare Dorotea Kerni dhe deputetja shqiptare në parlamentin kroat, Ermina Lekaj Prljaskaj, shkruan Fol Drejt.
Gëzim Olluri – Fol Drejt
“Kush i vret fëmijët” dhe “Gjenocidi serb mbi shqiptarët 1844-1999” nga autorët Nusret Pllana e Agim Aliçkaj janë promovuar edhe në gjuhën kroate të përkthyera nga Ilaz Berisha. Prezantimi i dy veprave është mbajtur në Novinarski Dom (Shtëpia e Gazetarëve) në Zagreb më 4 dhjetor, datë që përkon me themelimin e organizatës: Shoqata e Grave Shqiptare të Zagrebit “Drita”.
Në organizimin e promovimit të librave “Kurrë mos harro” morën pjesë deputetja shqiptare, Ermina Lekaj Prljaskaj, zëvendëse ambasadorja e Shqipërisë në Zagreb, Alma Kasa, ambasadori i Republikës së Kosovës në Zagreb, Martin Berishaj. Në prani të pjesëmarrësve shqiptarë dhe miqve kroatë, figura institucionale dhe autorët e librave njëzëri kërkuan që gjenocidi serb kundër shqiptarëve të mos harrohet kurrë dhe të kultivohet dashuri e vetëdije kombëtare ndaj shtetit e kombit shqiptar.
Personalitete nga politika shqiptare e Kosovës dhe Shqipërisë kërkuan që shqiptarët të jenë të bashkuar e unifikues kur bëhet fjalë kundër politikës së papërgjeshme serbe. Gjithashtu, u kërkua që autoritetet vendore dhe ndërkombëtare të vendosin drejtësi për popullin shqiptar dhe t’i kërkohet në vazhdimësi përgjegjësi Serbisë për gjenocidin e shkaktuar me polici e ushtri.
Gjatë promovimit janë shfaqur edhe filma e dokumentarë që paraqesin e dëshmojnë gjenocidin, krimet çnjerëzore dhe spastrimin etnik nga ushtria kriminale serbe kundër shqiptarëve brenda trojeve të Kosovës e Shqipërisë Etnike. Tashmë librat e veprimtarëve Nusret Pllanës dhe Agim Aliçkajt janë botuar në nëntë gjuhë të ndryshme në rrafshin ndërkombëtar.
Përveç promovimit në kryeqendrën kroate, Zagreb, librat janë promovuar edhe në dy qytetet tjera, Pula dhe Rijeka. Botimet në nëntë gjuhë të botës në të kaluarën janë shpërndarë nga autorët në institucione vendore e ndërkombëtare në mënyrë që t’u bëhet e ditur opinionit ndërkombëtar e kaluara e dhimbshme e popullit shqiptar. Librat përmbajnë dëshmi, fakte, argumente, fotografi, raporte, dosje, dokumente e rrëfime rreth gjenocidit serb kundër shqiptarëve. /FolDrejt/
