Kryeministri i Kosovës, Albin Kurti, i kërkoi Bashkimit Evropian që të heqë sanksionet ndaj Kosovës.
“Ne u kritikuam për dhunën në veri vitin e kaluar – padrejtësisht – dhe BE-ja vendosi masa kundër Kosovës. Nga ana tjetër, Serbia është duke u rreshtuar me Federatën Ruse në lidhje me agresionin në Ukrainë dhe nuk ka sanksione për Serbinë”, tha Kurti për “Politico”.
Kurti tha për “Politico” se qeveria të cilën ai e drejton është e përkushtuar që të mbajë zgjedhje shpejt.
Kreu i ekzekutivit ka thënë se zgjedhjet në komunat me shumicë serbe në veri mund të mbahen brenda pak muajve të ardhshëm.
“Mund të jenë këtë vit – në disa muajt e ardhshëm”, tha ai, ndërsa shtoi se nënshkrimet nga të paktën 20 për qind e votuesve me të drejtë vote do të nevojiten për të nisur procedurën – një proces që është duke u zhvilluar.
“Politico” shkruan se muajin e kaluar, mbi 10 vende evropiane i kërkuan shefit të diplomacisë evropiane, Josep Borrell të heqë kufizimet politike dhe ekonomike ndaj Kosovës, duke vënë në dukje gjithashtu rolin që Serbia kishte luajtur në sulmin e 24 shtatorit në Banjskë të Zveçanit.
Tutje, ky medium shkruan se BE-ja është përmbajtur nga vendosja e masave kundër Serbisë, pavarësisht shqetësimeve të përhapura për zgjedhjet e muajit të kaluar në vend. Brukseli dënoi “përfshirjen vendimtare” të presidentit serb Aleksandar Vuçiq në zgjedhjet e 17 dhjetorit.
Kurti tha gjithashtu se Kosova dëshiron të anëtarësohet në NATO edhe pse katër anëtarë të aleancës ende nuk e kanë njohur shtetin.
“Ne duam t’i bashkohemi NATO-s dhe momenti i parë historik do të ishte Partneriteti për Paqe”, tha Kurti.
“Politico” shkruan se qeveria e Kurtit ka rritur shpenzimet e mbrojtjes, pjesërisht si përgjigje ndaj agresionit të shtuar serb, tha ai.
Kosova kohët e fundit bleu drone “Bayraktar” nga Turqia dhe pritet të marrë raketa antitank “Javelin” nga ShBA-ja – lëvizje që Serbia pritet t’iu kundërpërgjigjet.
