Kryeministri Albin Kurti sikur mori dy vitamina D në Greqi – atë që vjen nga dija, dhe atë që vjen nga dielli.
Ai për nëntë ditë qëndroi në bregdetin helen ku ishte pjesë e simpoziumit Symi që mbledh mendimtarë e politikanë nga anembanë bota, dhe përgjatë viteve pjesë e tij kanë qenë edhe emra si Bill Clinton, Catherine Ashton e Antonio Guterres.
Ai, gjatë vizitës së tij, ishte po ashtu pjesë e konferencës “The Economist”
Me t’u kthyer në atdhe, kompleksioni i tij i zeshkët në këtë mesverë përvëluese nuk kishte se si të mos vihej re.
Ai u kthye tek sot dhe menjëherë ishte pjesë e seancës së sotme parlamentare ku nuk munguan thumbat nga opozita.
I pari që ia vuri në pah tenin kryeministrit në Kuvend, ishte deputeti i Lidhjes Demokratike të Kosovës, Arben Gashi.
“Qenke rrezitur”, iu drejtua Gashi kryeministrit.
Kurti nuk la pa e adresuar komentin e Gashit, ndonëse nuk ia përmendi emrin, duke e potencuar rëndësinë e seancës parlamentare kundrejt komenteve për pamjen e tij.
“Me fjalë të tjera, ishte një seancë e suksesshme në të cilën më së paku kishte rëndësi se kujt i dukesha i rrezitur unë”, tha ai.
Pothuajse gjithmonë kur i thuhet dikujt që është rrezitur, një gjë e tillë vjen në formë komplimenti, por është një kompliment që ndërlidhet kryesisht me ditë pushimi të shijuara në bregdet – andaj, kuptohej se Kurti s’kishte se si ta pranonte mirë.
Se a u rrezit duke pushuar, duke mësuar apo duke punuar, kryeministri megjithatë…u rrezit në nëntëditorin e tij në Greqi.
