Kryeministri i Kosovës, Albin Kurti, ka përkujtuar masakrën e Gjakovës duke theksuar se krimet e Serbisë në Kosovë nuk mund të zhduken e as të harrohen, shkruan Fol Drejt.
“Kufomat në shtëpinë e Vejsave ishin krejt të karbonizuara. Unë shkova të merrja batanije në spital, por ata nuk kishin më shumë se një copë. Nëntëmbëdhjetë trupa të karbonizuar u mbështollën me një batanije. U varrosën në tre varre”, citoi Kurti një dëshmitar të Human Rights Watch.
Kurti rikujtoi se në natën mes 1 dhe 2 prillit 1999, në Lagjen e parë në Gjakovë, forcat serbe masakruan e vranë mbi 60 civilë shqiptarë. Në shtëpitë e tyre, i dogjën të gjallë e të vdekur anëtarët e familjeve Vejsa, Hoxha, Haxhiavdija, Caka, Gashi dhe Nuçi. Mosha e të vrarëve ishte nga 2 deri në 75 vjeç.
Ai theksoi se krimet e luftës, gjenocidi e krimet kundër njerëzimit nuk janë të kaluara derisa dikush nuk merr përgjegjësi e denim për to. Krimet e Serbisë në Kosovë nuk mund të zhduken e as të harrohen.
“Ne i përkujtojmë në secilin përvjetor për të mos i harruar kurrë. Sot përkujtojmë të vrarët në Gjakovë. Qoftë i përjetshëm kujtimi për ta!”, tha në fund Kurti. /FolDrejt/
