Faton Kurti, kryetar i Republikanëve të Kosovës, ka thënë se Rusia po synon destabilizimin e Ballkanit me luftë të re, për të zvogëluar vëmendjen e perëndimit ndaj pushtimit në Ukrainë.
Për këtë, sipas tij, Rusia po përdor argatët e saj si Aleksandar Vuçiq dhe Milorad Dodik, si dhe disa “shqipfolës”, përcjell Bota sot.
Kurti ka kërkuar nga Qeveria e Kosovës që urgjentisht të marrë masa parandaluese ndaj rrezikut që po i kanoset Kosovës dhe të mbyllë Zyrën Ruse në Prishtinë.
Reagimi i Kurtit në Facebook:
Rusia me argatët e saj synon detabilizimin e Ballkanit!
Rusia prej dekadash harxhon më shumë se 1.2 miliardë euro në vit për të prodhuar dhe shpërndarë lajme të rrejshme “Fake News” në Ballkanin Perëndimor!
Një buxhet shumëfish edhe më të madh e shpenzon për t’i blerë dhe mbështetur politikanët, të cilët e bëjnë argatin e tyre në Ballkan. Disa nga këta tanimë të njohur për të gjithë ne.
Rusia në realitet nuk ka një interes direkt për Ballkanin, por i shërben për të hapur një konflikt të ri në Evropë. Për të realizuar këtë plan Rusia përdor argatët e saj si Vuçiq dhe Dodik duke u shoqëruar me disa shqipfolës.
Hapja e një lufte të re në Evropë do e zvogëlonte vëmendjen e perëndimit ndaj luftës në Ukrainë.
Në interesin gjeostrategjik të Rusisë nuk është Ballkani, por një pjesë e Ukrainës dhe shtetet Baltike.
Për të parandaluar një konflikt të mundshëm të iniciuar nga Serbo-Rusët në Kosovë dhe në rajon, qeveria e Kosovës me institucionet përkatëse duhet urgjentisht të ndërmarrin veprime parandaluese ndaj këtij rreziku që po i kanoset Kosovës. Një nga këto preventiva është edhe mbyllja e Zyrës Ruse në Prishtinë.
Detyra e AKI-së është që t’i zbulojë dhe t’i arrestojë mediat, politikanët dhe individët të cilët e bëjnë argatin e agjendës Serbo-Ruse.
