Kryeministri i Kosovës Albin Kurti, ka reaguar ndaj Serbisë pasi ndaloi pjesëmarrjen e boksierëve kosovarë në Kampionatin Botëror të Boksit në Beograd.
Përmes një shkrimi në Twitter, Kurti i ka bërë thirrje Bashkimit Evropian që të dënojë veprimin diskriminues të Beogradit.
Boksierët kosovarë ishte planifikuar të merrnin pjesë në Kampionatin Botëror të Boksit, që ka nisur në kryeqytetin serb, por Serbia e pengoi shkuarjen e tyre në fundjavë për shkak të simboleve shtetërore.
Ditë më parë, Asociacioni Botëror i Boksit tha se Kosova është anëtare fuqiplotë e tij dhe se pret pjesëmarrjen e saj në Kampionatin Botëror të Boksit për meshkuj.
Lidhur me këtë zëdhënësi i BE-së Peter Stano deklaroi se BE-ja mbështet kërkesën e Asociacionit Ndërkombëtar të Boksit që Federatës së Boksit të Kosovës t’i mundësohet pjesëmarrja e barabartë në gara.
Ndërsa ministri i Kulturës, Rinisë dhe Sportit i Kosovës, Hajrullah Çeku, e kritikoi mungesën e reagimit të BE-së ndaj vendimit të Serbisë.
Çeku paralajmëroi se gjatë kësaj jave Kosova do të vendosë për ndalimin e zhvillimit të aktiviteteve sportive paralele serbe.
