Kryeministri i Kosovës, Albin Kurti ka uruar Ditën Ndërkombëtare të Punëtorëve, ndërsa ka theksuar se ekzekutivi po angazhohet për barazi, të drejta dhe kushte më të mira të punës e jetesës, shkruan Fol Drejt.
“”8 orë punë, 8 orë argëtim dhe 8 orë pushim”, ishte slogani i kërkesës në kundërshtim të eksploatimit të punëtorëve që për herë të parë u bë publikisht në Australi më 1885. Një vit më vonë në po këto kërkesa kujtojmë rezistencën e njohur të punëtorëve në Çikago. Sot e asaj dite me 1 Maj shënojmë Ditën Ndërkombëtare të Punëtorëve, jo vetëm duke i kujtuar ata, por edhe duke u angazhuar për barazi, të drejta dhe kushte më të mira të punës e jetesës.”, shkroi Kurti në Facebook
Kurti theksoi se si qeverisje e re kanë ndërmarrë një sërë hapash, vendimesh e iniciativash ligjore që prekin direkt jetën e punëtorëve dhe kanë hartuar dhe dërguar në Kuvend Projektligjin për Pagën Minimale, ligj që ekzekutivi pret që Kuvendi ta miratojë sa më parë.
Ai shtoi se me qëllim të shtimit të inspektimeve për zbatim sa më të mirë të ligjit të punës është ndarë buxheti për të shtuar numrin e inspektorëve në terren. Ndërkohë që në buxhetin e këtij viti është paraparë rritja e inspektorëve në +240 në sektorë të ndryshëm.
“Gjatë këtyre dy viteve qeverisje kemi ndërmarrë masa që nxisin punësimin me theks të veçantë punësimin e grave dhe të rinjve. Me masën 1.3, rreth 5 mijë gra më shumë janë punësuar, ndërkaq përmes platformës ‘Superpuna’ kemi mbështetur punësimin e të rinjve, me ç’rast nga muaji shkurt janë realizuar 4501 marrëdhënie pune përmes kësaj platforme (deri në çastin e këtij postimi).”, shkroi tutje Kurti.
Ai përmendi edhe rritjen e pagave në sektorin publik dhe mbështetjen për rritjen e pagave për 17 mijë punëtorë të sektorit privat përmes pakove të ndihmës nga Qeveria.
“Punësimi ka qenë njëri prej prioriteve tona kryesore dhe së bashku me të esenciale janë edhe të drejtat në punë. Në këtë drejtim në vitin e kaluar janë bërë 6316 inspektime nëpër biznese që synim kanë pasur monitorimin e respektimit të Ligjit të Punës dhe ligjeve të tjera në fuqi. Vetëm në tremujorin e parë të këtij viti janë shqiptuar 153 gjoba për mosrespektim të këtyre ligjeve.”, u shpreh Kurti.
Në fund, i pari i Qeverisë tha se Kosova ka vuajtur edhe nga papunësia edhe nga shkelja e të drejtave në punë, ndërsa u shpreh se janë duke u përpjekur që krahas zgjerimit të punësimit, të eliminojnë në maksimum shkeljet e të drejtave në punë. Kurti tha se janë të vetëdijshëm për gjendjen në të cilën e kanë gjetur punëtorin, por do të vazhdojnë të jenë të pakompromis në rregullimin e kushteve të punës dhe respektimin e të drejtave të tij të garantuar me Kushtetutë. /FolDrejt/
