Në bisedimet me Presidentin dhe Kryeministrin e Serbisë, Kancelari austriak theksoi se Ballkani Perëndimor meriton të jetë pjesë e Bashkimit Evropian.
Kancelari austriak Sebastian Kurz tha në një bisedë me zyrtarët e lartë të Serbisë se anëtarësimi në Bashkimin Evropian për atë vend është i mundur vetëm nëse Serbia dhe Kosova arrijnë një marrëveshje dhe bien dakord mbi një zgjidhje për Kosovën, duke u bërë thirrje qytetarëve të Serbisë të mbështesin të gjithë politikanët që duan të marrin atë rrugë.
Të hënën, në bisedime të veçanta me presidentin serb Aleksandar Vuçiç dhe kryeministrin Anne Brnabiç, ai vlerësoi reformat ekonomike të ndërmarra në atë vend dhe theksoi se Ballkani Perëndimor meriton të jetë pjesë e BE-së, shkruan Al Jezeera Balkans, përcjell Foldrejt.com.
“I lus qytetarët e Serbisë të mbështesin të gjithë politikanët që duan të marrin këtë rrugë“, tha kancelari austriak dhe theksoi se Austria ka një qëndrim të qartë – nëse rajoni vjen në një marrëveshje që do të sigurojë paqen në afat të gjatë, Viena nuk do të pengojë atë marrëveshje, por përkundrazi do jep përkrahje .
Është e rëndësishme që Serbia të mos përulet
Duke inkurajuar të dyja palët që të vazhdojnë negociatat, Kurz vuri në dukje se Serbia dhe Kosova janë para “një mundësie unike që e kaluara të mbetet prapa” dhe së bashku të lëviznin në një të ardhme më të suksesshme.
Presidenti i Serbisë theksoi se “ekziston nevojë për një zgjidhje kompromisi” midis Serbisë dhe Kosovës, por paralajmëroi se “më shumë se 60% e njerëzve në Serbi kundërshtojnë marrëveshjen me shqiptarët”.
“Jemi të gatshëm të kërkojmë të ardhmen, të luftojmë për të ardhmen, por është e rëndësishme që Serbia të mos përulet. Nuk mundet që pala shqiptare të marrë gjithçka dhe pala serbe asgjë”. Kushdo që është gati për një qëndrim të tillë që të fitojnë të dyja palët, gjithmonë do të ketë një partner për të folur këtu në Beograd”, theksoi Vucic.
Larg nga zgjidhja përfundimtare
I pyetur për ndryshimin e kufijve si një zgjidhje e mundshme për çështjen e Kosovës, Vuçiç tha: “Ju po flisni për ndryshimin e kufijve dhe pyetja ime është: për çfar kufijsh e keni fjalën – për ata që njihen nga Austria ose Sërbia, Rusia apo Shtetet e Bashkuara, Gjermania apo Kina, Italia apo Spanja? Ju duhet të pranoni që këto vende nuk janë të vogla dhe të parëndësishme”.
Ai sugjeroi se si “do të ishte e rëndësishme që kompromisi të përcaktohet në përputhje me vullnetin e përbashkët të serbëve dhe shqiptarëve”.
“A jemi pranë ndonjë lloj zgjidhjeje? Jo nuk jemi, përkundrazi mund të them që jemi mijra kilomtra larg, por kjo është zgjidhje e vetme për marrëdhëniet midis serbëve dhe shqiptarëve,” përsëriti Vuçiq.
Kancelari austriak gjithashtu u takua me kryeministrin serb dhe vlerësimi i tyre i përbashkët është se të dy vendet janë “partnerë të rëndësishëm ekonomik” dhe se është e rëndësishme të shfrytëzohen mundësitë për zgjerimin e bashkëpunimit ekonomik.
Mbështetje në rrugën drejt Bashkimit
Duke falemderuar Austrinë për mbështetjen në procesit të Eurointegrimit dhe hapjes së kapitujve të rinj, Brnabić tha se ishte i bindur se Vjena do të vazhdonte të mbështeste Beogradin në rrugën drejt BE-së.
Kancelari austriak “vlerësoi rezultatet e reformave ekonomike në Serbi, stabilitetin ekonomik dhe rimëkëmbjen e ekonomisë”, njoftoi qeveria serbe të hënën në mbrëmje.
Serbia shpreson që deri në fund të presidencës austriake të BE-së të hapë tre kapituj negociues me BE-në në konferencën ndërqeveritare në dhjetor.
