Shefja e grupit parlamentar të Lëvizjes Vetëvendosje, Mimoza Kusari-Lila, thotë se i ka propozuar homologut të saj nga LDK-ja, Arben Gashit, që të bëhet zëdhënës i VV-së.
Kusari-Lila thotë se Gashi është i obsesionuar me grupin parlamentar të Vetëvendosjes prandaj vazhdimisht bën komente lidhur me zhvillimet brenda grupit.
“Duket se [Arben] Gashi e ka një obsesionim me Grupin Parlamentar të Lëvizjes Vetëvendosje. Unë i kam propozuar që nëse është i interesuar mund të marrë pozitë të përfaqësuesit të grupit në kuptimin e zëdhënësit, sepse merret vazhdimisht me komente se çfarë ndodh brenda në grup. Deklaratat e tij janë absolutisht të pavërteta dhe të paqëndrueshme”, është shprehur ajo në një intervistë për RTV21.
Shefja e deputetëve të Vetëvendosjes ka thënë se janë të pavërteta dhe nuk qëndrojnë deklaratat e Arben Gashit që tetë deputetë të koalicionit qeverisës do të kalojnë në LDK.
“Ka indikacione, ka lëvizje dhe interesime. Janë tetë deputetë që kanë shprehur interesim për të ardhur në koalicion”, kishte thënë Gashi në RTV Dukagjini duke aluduar se Qeveria Kurti do të rrëzohet në vjeshtë.
