Në seancën e sotme parlamentare është diskutuar rregullorja e re e kuvendit, e cila më pas edhe është miratuar.
Adnan Rrustemi, Kryetar i Komisionit për Legjislacion tha se:
“Draft-rregullorja definon procedurat për seancën konstitutive në përputhje me aktgjykimin e Gjykatës Kushtetuese të vitit 2014, kryesimin e seancës në rastin e refuzimit të seancës konstituive, nominimin dhe zgjedhjen e kryetarit të Kuvendit, përcakton mënyrën e zgjedhjes së kryetarëve, proceduarën e zgjedhjes së nënkryetarëve dhe procedurën e nominimeve të zgjedhjes së nënkryetarëve të pakicave.”
Shumë nga ndryshimet që i parasheh kjo rregullore, sipas Rrustemit, deputet i Vetëvendosjes, janë për t’i shmangur vonesat procedurale dhe për ta forcuar rolin e kryetarit të Kuvendit në çështjet si përgatitja dhe propozimi i rendit të ditës, shpërndarja e projektligjeve, duke mos i pakësuar kompetencat e kryesisë.
Nga grupet e tjera parlamentare u dhanë propozime të tjera përplotësuese.
“Ka mangësi që duhet të adresohen në mes dy leximeve. Janë disa aktgjykime të Gjykatës Kushtetuese që nuk janë të përfshira në rregullore. Siç është konstituimi i Kuvendit, ku aktvendimi e Gjykatës Kushtetuese e bënë të qartë kur konstitutohet Kuvendi, ndërsa propozimi i ri në rregullore bie ndesh me këtë, pasi kuvendi nuk konstituohet pa u zgjidhur të gjithë nënkryetarët e Kuvendit”, tha Abelard Tahiri, Kryetar i Grupit Parlamentar të PDK-së.
Përkrahje kësaj rregulloreje i dhanë edhe grupet e tjera parlamentare, ndërsa ajo u votua që në lexim të parë./FolDrejt/
