Presidenti i Parlamentit Evropian, David Sassoli, ka vdekur sot në moshën 65-vjeçare pas komplikimeve për shkak të mosfunksionimit të sistemit imunitar.
Politikani italian i qendrës së majtë kishte pasë telashe serioze me shëndetin edhe në muajin shtator të vitit të kaluar, derisa ishte alivanosur edhe gjatë një seance të PE-së.
E pikërisht në një nga videomesazhet e tij të fundit para vdekjes, Sassoli shpjegoi se ai ishte sëmurë nga pneumonia, transmeton Klankosova.tv.
Në videon, e postuar në Twitter, ai kishte thënë se shpreson që së shpejti t’i kthehet detyrave të tij në krye të Parlamentit Evropian dhe kishte falënderuar mjekët, kolegët dhe gjithë italianët për mbështetjen.
“Në muajin shtator gjatë seancës plenare të Parlamentit Evropian unë u alivanosa pasi kisha një pnemuoni të rëndë. Kisha shumë temperaturë dhe u shtrova në spital në Strasburg. Më pas u ktheva në Itali për t’u rikuperuar, por për fat të keq m’u rikthye gjendja e njëjtë dhe kjo bëri që mjekët të më rekomandojnë një sërë testimesh dhe kontrollesh mjekësore dhe pikërisht këtë jam duke e bërë. Mjekët po punojnë tani për t’u siguruar se mund t’i kthehem detyrave të mia sa më shpejt që është e mundur. Do të doja t’i falënderoja për punën dhe vëmendjen e tyre, ashtu siç do të doja t’i falënderoja kolegët e mi në parlament për mbështetjen e tyre. Dua t’i falënderoj gjithashtu edhe qytetarët që kanë treguar dashuri dhe solidaritet. Ju përshëndes të gjithëve dhe mezi pres t’iu shoh së shpejti në parlament”, kishte deklaruar ai.
David Sassoli ka vdekur në një spital në Aviano të Italisë.
