Përfaqësuesi Special i BE-së për Ballkanin Perëndimor, Miroslav Lajçak, tha se ngjarjet në veri të Kosovës janë një “përshkallëzim absolutisht i panevojshëm dhe i palogjikshëm” dhe se “vetëm një zgjidhje politike përmes dialogut ekzistues” është e mundur dhe se është e qartë se NATO-ja nuk mund ta zgjidhë këtë dhe se çështja nuk i takon NATO-s ta zgjidhë, përcjell Fol Drejt.
Lajçak theksoi se arsyeja e përshkallëzimit të konfliktit është mosbesimi i thellë mes dy komuniteteve dhe fakti se në katër komuna në veri të Kosovës janë mbajtur zgjedhjet dhe janë zgjedhur kryetarë komunash që “plotësonin kriteret ligjore, por që kur vjen te legjitimiteti apo përfaqësimi, sigurisht që ka një pikëpyetje të madhe”.
“Më duhet të them se ky është një përshkallëzim absolutisht i panevojshëm dhe i palogjikshëm, sepse pas shumë e shumë muajsh negociata arritëm dy marrëveshje të rëndësishme, kjo do të thotë se kemi një rrugë drejt normalizimit, kemi një program që trajton qartë të gjitha çështjet e hapura që ne filluam ta zbatojmë atë dokument dhe më pas ndodhi kjo, e cila është krejtësisht e panevojshme, por fatkeqësisht krijon shqetësime shumë serioze”, tha Lajçak.
Sipas tij, “de-përshkallëzimi është i nevojshëm”.
I pyetur nëse vendosja e forcave shtesë të NATO-s në terren do të kontribuojë në de-përshkallëzimin e konfliktit, Lajçak përsëriti se është e qartë se ky problem mund të zgjidhet vetëm politikisht, pra përmes dialogut ekzistues.
“NATO luajti një rol shumë të rëndësishëm, mbi të gjitha, në ruajtjen e paqes në terren. Edhe në këtë situatë të nxehtë aktuale, njësitet e KFOR-it ndanë policinë e Kosovës nga serbët e Kosovës. Fatkeqësisht, shumë prej tyre u plagosën në atë konflikt. Duke forcuar NATO-n – dhe garancitë se do të parandalohet përshkallëzimi i mëtejshëm janë më të forta, por është e qartë se NATO-ja nuk mund ta zgjidhë atë, me gjithë respektin që kam për NATO-n”, tha Lajçak për “Deutsche Welle”. /FolDrejt/
