Miroslav Lajçak është deklaruar së fundi për çështjen e Asociacionit të Komunave me Shumicë Serbe, përndryshe pikën kyçe të dialogut ndërmjet Kosovës dhe Serbisë, shkruan Fol Drejt.
I dërguari i Bashkimit Evropian për dialogun Kosovë-Serbi, Lajçak, këtë deklaratë e ka bërë pas vizitës të realizuar në Zvicër, ku ka takoi diplomaten Livia Leu, me të cilën ka diskutuar për ecurinë në procesin e dialogut.
“Presidenti Vuçiq dhe kryeministri Kurti u takuan në Bruksel për të diskutuar një çështje vendimtare të personave të zhdukur. Jam i kënaqur që të dy udhëheqësit ranë dakord të punojnë së bashku për të sqaruar vendndodhjen e njerëzve që u zhdukën gjatë luftës. Ne mirëpresim miratimin e palëve të deklaratës për personat e zhdukur dhe presim që ato të bëjnë përparim në mbylljen e rasteve të pazgjidhura të personave të zhdukur. Kjo jo vetëm që do t’i ndihmojë familjet e tyre të gjejnë paqe, por edhe do të avancojë normalizimin ndërmjet Kosovës dhe Serbisë”, ka deklaruar Lajçak.
Ndërsa për Asociacionin ai ka thënë se palët veç e kanë hedhur një hap të rëndësishëm:
“Palët gjithashtu bënë një hap të rëndësishëm dhe simbolik drejt themelimit të Asociacionit/Bashkësisë së komunave me shumicë serbe. Megjithëse drafti i parë i paraqitur nga ekipi menaxhues nuk është përfundimtar, ai është një pikënisje e rëndësishme për diskutimet e ardhshme në nivelin e Kryenegociatorëve”, u shpreh Lajçak.
Ua kujtojmë se draft-propozimi i cili iu servua palëve në Bruksel nga Ekipi Menaxhues, u cilësua si i papranueshëm nga Kryeministri Albin Kurti, ndërsa vetë anëtarët e këtij ekipi u shkarkuan një ditë më vonë nga Qeveria e Kosovës./FolDrejt/
