Përpjekja e parë për të nisur një satelit nga Britania e Madhe dështoi pak para mesnatës së të hënës, kur kompania e lëshimit Virgin Orbit raportoi një “anomali” që pengoi raketën të arrinte në orbitë.
Misioni Start Me Up u ngrit nga pista në aeroportin Cornwall Newquay me raketën e Virgin’s LauncherOne të mbajtur nën krahun e një Boeing 747 të modifikuar dhe të lëshuar më vonë mbi Oqeanin Atlantik.
Por pak para mesnate, një përfaqësues i Virgin Orbit njoftoi në një transmetim të drejtpërdrejtë se raketa kishte pësuar një “anomali” që bëri që ajo të mos arrinte në orbitë.
“Duket se kemi një anomali që na ka penguar të arrijmë në orbitë. Ne jemi duke e vlerësuar informacionin”, njoftoi Virgin Orbit.
Raketa duhej të niste motorin e saj në një lartësi prej rreth 10 mijë kilometrash mbi Atlantik dhe të merrte nëntë satelitë të vegjël, me aplikime të ndryshme civile dhe mbrojtëse, në orbitën e Tokës.
Autoriteti i Aviacionit Civil të Britanisë (CAA) ka autorizuar Virgin Orbit, pjesërisht në pronësi të miliarderit Richard Branson, për të kryer nisjen e parë të Britanisë në hapësirë.
Qindra njerëz ndoqën ngritjen e Boeing 747 me një raketë në Newquay rreth orës 22:15, ndërsa nga altoparlantët dëgjohej kënga Start Me Up e Rolling Stones, pas së cilës u emërua misioni.
Supozohej të ishte hera e parë që satelitët lëshoheshin nga Evropa.
Pengesa i jep një goditje të mëtejshme ambicieve hapësinore të Evropës pasi misioni i raketës italiane Vega-C dështoi pas ngritjes nga Guiana Franceze në fund të dhjetorit./FolDrejt/
