Panairi i Librit i Lajpcigut (Lejpzigut), ndër më të mëdhenjtë në Evropë, është organizuar sivjet pas tri vjetësh mungesë. Në këtë event të madh kulturor, është prezantuar edhe letërsia e Kosovës, por mënyra se si është prezantuar krijimtaria jonë atje, duket se nuk i ka pëlqyer Mehmet Krajës, Kryetar i Akademisë së Arteve dhe Shkencave të Kosovës (AShAK), shkruan Fol Drejt.
Në një reagim me titull “Letërsia në kaos”, ka kritikuar përfaqësimin e Kosovës, i cili është bërë nga Biblioteka Kombëtare e Kosovës.
“Në Panairin e Librit në Laipcig të Gjermanisë, ndër më të mëdhenjtë në Europë, përfaqësimi i Kosovës u bë nga Biblioteka Kombëtare e Kosovës, besoj rasti i vetëm, kur një shtet përfaqësohet nga një institucion “libërlexues” dhe jo “libërbotues”. Nuk e kam të qartë prej nga e merr mandatin Biblioteka Kombëtare të përfaqësojë letërsinë, fundja kjo nuk ka rëndësi, por nga pamjet në TV pash një stendë të shëmtuar, me një renditje librash me pamje primitive, dhe me disa shkrimtarë (respekt për ndonjë përjashtim!) që nuk marrin vesh as nga i bie letërsia shqipe! Pse nuk rrinë në shtëpi të vet këta njerëz, këtë nuk e kam të qartë dhe pse nuk i mbajnë këta libra të shëmtuar në podrumet e Bibliotekës, por i nxjerrin atje ku na shohin të gjithë! Edhe një gjë për kolegët e mi shkrimtarë: hiquni ma patericave të “Traduki-t”!” – ka shkruar Kraja.
Komentit të tij negativ i janë përgjigjur shumë lexues, ndër ta edhe përkrahës, e edhe kritikues.
Ua kujtojmë që shkrimtari Ag Apolloni për romanin “Kësulkuqja – përrallë për të rritur”, gjatë ditëve të panairit u nderua me çmimin “Special Mention” , në një ceremoni solemne të ndarjes së çmimeve për letërsi nga Bashkimi Evropian./FolDrejt/
