Klubi i futbollit Barcelona do të duhet t’i paguajë Bayernit një bonus prej 1.25 milionë euro sipas kontratës për transferimin e përfaqësuesit polak Robert Lewandowski te skuadra katalanase, raporton “Radio Catalunya”.
Lewandowski (34) arriti vitin e kaluar nga Bayern te Barcelona për 45 milionë euro. Marrëveshja e transferimit përfshinte gjithashtu një bonus prej 1.25 milionë euro nëse sulmuesi polak shënonte të paktën 25 gola në sezon për skuadrën Nou Camp.
Lewandowski shënoi golin e vetëm për skuadrën e tij në ndeshjen e dytë të 1/16 finaleve të Ligës së Evropës kundër Manchester United (1:2), dhe ishte goli i tij i 25-të në 30 ndeshje këtë sezon në të gjitha garat për Barcelonën. Mediat spanjolle raportojnë se Bayern pret që Barcelona të përmbushë detyrimet kontraktuale ndaj klubit gjerman në ditët në vijim, transmeton Fol Drejt.
