Libani synon të paraqesë një ankesë zyrtare në Këshillin e Sigurimit të OKB-së për agresionin e qëllimshëm izraelit që ndodhi herët të premten, sipas një deklarate të Ministrisë së Jashtme, raporton Anadolu Agency, përcjell Fol Drejt.
Ministria tha se Izraeli kishte shkelur sovranitetin e Libanit duke bombarduar zonat në Libanin jugor.
“Ministri i Punëve të Jashtme dhe Emigrantëve Abdallah Bou Habib udhëzoi Misionin e Përhershëm të Libanit në Kombet e Bashkuara në Nju Jork që të paraqesë një ankesë zyrtare në Këshillin e Sigurimit të OKB-së në lidhje me ndikimin e bombardimeve izraelite dhe agresionit të qëllimshëm në agimin e sotëm [e premte] në zona në Libanin jugor”, thuhet në një deklaratë të ministrisë.
Ai e quajti agresionin izraelit “një shkelje flagrante të sovranitetit të Libanit dhe një shkelje flagrante të Rezolutës 1701 të Këshillit të Sigurimit të OKB-së… (që) kërcënon stabilitetin që gëzonte dikur jugu libanez”.
Rezoluta 1701 e Këshillit të Sigurimit të OKB-së bën thirrje për një ndërprerje të plotë të armiqësive dhe tërheqjen e Izraelit nga Libani jugor.
Të premten herët, ushtria izraelite nisi sulmet ajrore në Liban disa orë pasi goditi Rripin e Gazës.
Në një deklaratë, ajo tha se goditi objektivat që i përkisnin grupit të rezistencës palestineze Hamas në Libanin jugor.
Ushtria izraelite tha të enjten se të paktën 30 raketa u hodhën nga Libani jugor drejt Izraelit.
Deri më tani, asnjë grup në Liban nuk ka marrë përgjegjësi të menjëhershme.
Zhvillimet erdhën pasi forcat izraelite sulmuan kompleksin e Xhamisë Al-Aksa në Jerusalemin Lindor të pushtuar dhe larguan me forcë besimtarët palestinezë për dy netë me radhë. /FolDrejt/
