Krerët e vendeve të Bashkimit Evropian do të nisin sot në Bruksel një takim dyditor, ku do të diskutohet për bashkëpunimin ekonomik, por edhe për vazhdimin e mbështetjes së vendeve evropiane për Ukrainën, raporton Klix, përcjell Fol Drejt.
Para seancës iu drejtuan publikut kryeministrja estoneze Kaja Kallas dhe letonezi Arturs Karinš. Kryeministrja e Estonisë iu referua veçanërisht çështjes së bashkëpunimit ekonomik ndërmjet vendeve të BE-së, si dhe marrëdhënieve me fuqitë e tjera dhe tha se Evropës i mungon konkurrueshmëria.
“Ne po humbasim konkurrencën, por duhet të reduktojmë administratën. Duhet të shohim se ku janë pengesat, por edhe ku është forca jonë. Mund të fokusohemi në sektorin e teknologjisë, ekonominë dixhitale dhe mund ta bëjmë së bashku,” tha Kallas.
Ajo iu referua edhe krizës në sektorin bankar dhe theksoi se ky sektor në Bashkimin Evropian është stabil dhe se nuk ka arsye për shqetësim.
“Sektori bankar në Evropë është i fortë sepse kaluam krizën. Ne mendojmë se duhet të kemi një sistem të përbashkët të garancisë së depozitave në mënyrë që të jemi të sigurt se bankat nuk do të dështojnë. Kjo do të përmirësojë gjithashtu tregun e përbashkët dhe Bashkimin Evropian.”, shpjegoi Kallas.
Nga ana tjetër, në prag të takimit, kryeministri i Letonisë Karinš theksoi zhvillimin e marrëveshjeve tregtare të BE-së me vende dhe pjesë të tjera të botës.
“Ne duhet të punojmë në marrëveshjet tona tregtare. Këto janë aspekte të rëndësishme se si do të jetojmë më mirë në të ardhmen. Bota rreth nesh po bëhet gjithnjë e më e vështirë. Kina po forcon bashkëpunimin me Rusinë. Evropa duhet të gjejë rrugën dhe qëndrimin e saj ndaj Kinës. Nuk mendoj se po e humbim lojën, por duhet të ndryshojmë fokusin”, tha kryeministri.
Përsa i përket prokurimit të burimeve energjetike, kryeministri i Letonisë tha se ky vend është në një situatë ndryshe nga pjesa tjetër e Evropës.
Letonia është në një situatë tjetër. Ne blejmë LNG dhe ka marrëveshje për kontrata afatgjata. Ajo ku ne fokusohemi janë burimet e rinovueshme të energjisë, veçanërisht energjia e erës. Kjo do të thotë se do të duhet të zhvillojmë teknologjinë e hidrogjenit për të ruajtur energjinë. E ardhmja afatgjatë është në prodhimin e gjelbër, por edhe ruajtjen e energjisë së gjelbër”, përfundoi Karinš. /FolDrejt/
