Kauzat 15 vjeçare të Lëvizjes Vetëvendosje, për 20 ditë janë hedhur në kosh. Partia që sot është në pushtet e ka lënë Kosovën tashmë pa taksë, e as reciprocitet ndaj Serbisë. Kjo parti ka ardhur në pushtet me kauza shpifëse, populiste e mashtruese. Kështu është shprehur kryetari i Nismës Socialdemokrate, Fatmir Limaj.
Në gjashtë vjetorin e partisë së tij, Limaj tha se në Kosovë të bërit politikë reale është e vështirë, derisa shtoi se zëri racional sipas tij nuk dëgjohet në këtë vend. Ai ka bërë ftesë që të punojnë të gjitha grupet opozitare, mirëpo ai tha se duan opozitë aktive pa kalkulime.
Limaj tha se çdo ditë do t’ua kujtojnë qytetarëve se kush ka qenë Albini dhe kush është tash kryeministri. Dhe për çka sipas tij, kryeministri sot është kthyer në një mashtrues.
“Sot në drejtimin e vendit është një parti, që 15 vjet e dini se çfarë kauzash kanë pasur. 20 ditë pas ardhjes në pozitë, harroi krejt ato kauza, në të cilat kanë ardhur. Kanë ardhur ne pushtet përmes kauzave shpifëse, mashtruese. Për 20 ditë i gjuajtën të gjitha në kosh. As taksë, e as reciprocitet. Kështu keni me pas në vazhdimësi. Në vend që me negociuar taksën, ai as nuk e negocioi e as vendosi taksën. Kurrgjë nuk është kjo, çka presim nga të tillët”, tha ai.
Limaj i ka quajtur hipokrizi thirrjet e zyrtarëve të LVV-së për bashkëpunim, pasi për shumë vite ata kishin refuzuar bashkëpunimin sa ishin në opozitë.
“Tani vjen një moment kur kanë rrënuar gjithçka, kërkojnë bashkëpunimin. Kjo tregon hipokrizi të njerëzve të tillë. Më vjen keq për njerëzit që u kanë besuar, dhe asnjëherë nuk kanë mbajtur fjalën ata që kanë votuar. Shpresoj që në Kosovë të kthehet dhe njerëzit të fillojnë të vlerësojnë jo vetëm kush po flet, por edhe çka po flet. Kosova po futet në një udhëkryq, shikoni sot vendin tonë. Ka një përplasje të jashtëzakonshme në gjitha anët. Ne jemi viktimë të atyre shpifjeve, vetëm që të cenohet çdo gjë e vlefshme në këtë vend”, ka deklaruar Limaj.
Sipas tij për gjashtë vjet kanë ndodhur zhvillime të jashtëzakonshme në jetën politike të Kosovës. Limaj tha se gjatë këtyre vjetëve është dëshmuar vendimi i tyre për të pasur një parti.
“Falë asaj real-politike që e kemi bërë, ne kemi qenë të kujdesshëm bë platformën tonë politike. Ne ju kemi shmangur politikës populiste, shpifëse dhe mashtruese. Misioni ynë si politikanë të ri ishte të japim kontributin dhe duke ndihmuar dhe zhvilluar… Zgjatja e dorës në shërbim të vendit që ne ka udhëhequr gjatë këtyre viteve. Ne kemi ruajtur interesin nacional para interesit tonë personal. Vizioni ynë politik ka qenë në vazhdimësi e drejtuar, e kujdesshme, duke qenë të fortë në vendime pa bërë zhurmë”, tha Limaj.
Sipas tij, nëse ishin mbështetur të gjitha veprimet e partisë së tij, Kosova tash do të kishte në një pozicion tjetër. Ai u zotua se Nisma është në politikë për t’i shërbyer vendit.
“Na kanë përshkruar ose kanë dhënë supozime, se kjo forcë politike, qysh në krijimin e saj, nuk do të jetë e suksesshme. Ne kemi thyer të gjitha supozimet që me skepticizëm e kanë parë zhvillimin e kësaj partie… Gati thuaja është e njëra situatë e të bërit politikë në Kosovë. Ne po vijmë në këtë përvjetor, pas zgjedhjeve te fundit, si strukturë partiake dhe ne jemi duke bërë analizat tona. Ne kemi bëre gabimet tona, dhe duhet t’i hjekim ato, mos t’i përsërisim. Ne do të bëjmë një analize të gjithmbarshme se cilat kanë qenë angazhimet, dobësitë, problemet, e gabimet. Ka ardhur koha që ne të kemi një parti klasike, një parti e cila e avancon statusin e vet, organizimin e vet. Ka ardhur koha e një organizimi te fuqishëm të partisë, në bazë dhe në shërbim të kohës”, u shpreh Limaj.
Kryetari i Nismës Socialdemokrate tha se sot me statusin opozitar, kanë synim të punojnë fuqishëm, që t’i shërbejnë Kosovës.
