Fillimi i vitit të ri shkollor, po shoqërohet me probleme. Ndryshe nga viti i kaluar, ku për një muaj nuk u çelën dyert e shkollave shkaku i grevës së organizuar nga Sindikata e Bashkuar e Arsimit, Shkencës dhe Kulturës (SBAShK), kësaj radhe procesi mësimor ka nisur më 1 shtator. E megjithatë, një problem tjetër ka nxjerr krye: ai i teksteve shkollore, shkruan Fol Drejt.
Ministria e Arsimit, Shkencës, Teknologjisë e Inovacionit (MAShTI), nuk ka arritur që t’i sigurojë librat për nxënësit, për ç’gjë ka nxitur debate dhe pakënaqësi në opinionin publik.
Çfarë po i shkruajnë prindërit Ministres Nagavci, e cila i uroi ata dhe nxënësit me rastin e 1 shtatorit?
Lajmi që MAShTI nuk ka arritur tua sigurojë librat nxënësve, u dha dhjetë ditë para fillimit të vitit të ri shkollor. Në një konferencë për shtyp Ministrja Arbërie Nagavci tha se ndër arsyet që e shtynë ministrinë të mos i blinte tekstet direkt nga shtëpitë botuese, ishte edhe çmimi i tyre:
“Kemi parë kontrata të negociuara, dhe jo rrallë ka pasur keqpërdorime e abuzime dhe të njëjtat i kemi adresuar. Ka pasur dallime të çmimeve të teksteve shkollore. Kemi pasur dallime për tekstet e të njëjtës klasë nga shtëpi të ndryshme.”
Por ajo paralajmëroi se shuma e mjeteve të destinuara për këto libra, do t’iu kalonte prindërve dhe kujdestarëve të nxënësve, ndërsa ata do të detyrohen që të aplikojnë për to nëpërmjet platformës E-Kosova.
E gjithë kjo ka ngritur mjaft pakënaqësi, dhe për rrjedhojë, komentet s’kanë qenë aspak pozitive në adresë të ministres.
Sot kur ajo ua urojnë prindërve dhe nxënësve fillimin e vitit të ri shkollorë, mjaft qytetarë e kritikuan atë për vendimin, duke u shprehur të mllefosur dhe duke thënë se ky vendim, është larg së qeni i drejtë dhe i duhur.
“Më së paku ishte dashtë me dal ti dhe me i uru nxënësit” – ka komentuar një qytetar te muri i ministres në llogarinë e saj në Facebook. Në vijim ai ia ka renditur arsyet se pse ajo nuk ka pasur të drejtë t’i urojë ata:
“Si mundesh me i uru për vit të mbarë, kur me vepra tregon se mësimi është si një cirk që s’ka fare rëndësi. Viti i kaluar me shumë vonesa, e ky vit pa libra. (2 vite me ngatërresa).
- Ku ishe në muajt Qershor, Korrik e Gusht për rregullimin e kësaj forme të cilën e keni zgjedhur që prindërit të merren me blerjen e librave. Cilado qoftë arsyeja, apo interesi i shtetit, me këtë punë fillove të merresh në fund të muajit Gusht, a nuk është Turp.
- Si është e mundur që zgjedh një opsion të cilin kinse për ta ruajtur shtetin, ti obligon cdo prind të hargjoj kohë e para, ku detyrohen nga fshatrat e ndryshme të len punën, e të dalin e të ndjekin librarit e ndryshme për kompletimin e librave.
- Pse gënjen se 50 euro janë për libra, kurse 30 euro për materiale shkollore, kurse vetëm librat e kalojnë vlerën prej 80 euro.
- Gjithqysh ishte dashtë që kjo punë të ishte e rregulluar më së largu deri në fund të muajit Korrik, dhe së paku ishte dashtë vlera të jetë 100 euro.
- Prandaj është turp me dal dhe me uru për një vit të mbarë. Nuk e di si është e mundur që as nuk të shkarkojnë, e as nuk jep dorëheqje. Ne duhet të urojmë për çdo vit: URIME VITI I CUDIRAVE.”
Komente të tjera edhe më negative vërshuan murin e Nagavcit, duke dëshmuar se pakënaqësia në lidhje me vendimin për të mos i blerë librat sivjet, është njëmend e madhe.
Bëhet fjalë për shuma të majme parash
Sipas të dhënave të ministrisë, deri më tani për këto shuma kanë aplikuar një numër i madh i prindërve. Këtë e konfirmoi vetë Ministrja Nagavci para disa ditësh, ndërsa njoftoi se “kemi përfunduar procedurat e pagesës për grupin e parë të aplikuesve që kanë aplikuar deri më datë 29 gusht për furnizim me tekste shkollore dhe materiale mësimore e që janë mbi 81 mijë përfitues.”
E aplikimi, ndërkohë, po shoqërohet me mjaft probleme teknike. Shumë prindër thonë se u është dashur të presin për orë të tëra, meqë platforma duket se është mbingarkuar nga kërkesat e shumta.
Përndryshe, vlera e saktë e ofertave të Operatorëve Ekonomikë (Shtëpive Botuese) të ofruara gjatë procedurave të tenderimit në procesin për furnizimin me tekste shkollore, nuk dihet. Në një reagim të Shtëpisë Botuese Dukagjini, thuhet se kësaj radhe ata u ofruan me një ofertë 4% më të ulët se sa në vitin 2022:
“Shtëpia jonë botuese, për hir të transparencës, dëshiron ta njoftojë opinionin publik se në ofertimin që kemi bërë në Ministri, pavarësisht inflacionit dhe rritjes globale të çmimeve, kemi ofertuar me çmim më të lirë për rreth 4% krahasuar me vitin 2022.”
Nga të dhënat e arkivuara nga procedurat tenderuese, del që kjo shtëpi, ishte ndër “më të përkëdhelurat”, për sa u përket librave shkollorë.
Sipas të dhënave të siguruara nga Fol Drejt, vendimi i Autoritetit Kontraktues për “Furnizim me tekste shkollore sipas programeve të reja mësimore për vitin shkollor 2022 2023 për klasën e 1-9”, kishte shpërblyer me kontratë disa operatorë.
Shtëpia Botuese Dukagjini kishte përfituar hiç më pak se 9 474 642,50 euro, nga kontrata. Albasi, Libri shkollor, Magjia e librit, Pegi, Luarasi, e Berati ishin përfituesit e tjerë. E deklarata e ministres rreth kontratave “të negociuara” dhe dyshimeve për “keqpërdorime e abuzime” nuk ishte aq e qartë. Duke qenë se vitin e kaluar, nën drejtimin e së njëjtës ministre janë lidhur kontrata me të njëjtit operatorë, nuk dihet në dyshimet e saj për keqpërdorime kanë të bëjnë me vitin paraprak, apo për vitet e mëhershme.
Hë për hë, një numër i madh i prindërve, ende nuk ia ka dalë t’i sigurojë mjetet e premtuara nga ky institucion, për fëmijët e tyre./FolDrejt/
