Askush nuk do të dëshironte një ndërhyrje luftarake në Ukrainë. Por, sipas informacioneve të inteligjencës perëndimore, Rusia tashmë është gati për ta kryer pushtimin e Ukrainës. Ka burime që e theksojnë edhe mundësinë e një pushtimi të Ukrainës Lindore.
Hapat drejt luftës
Së fundi në Dumën ruse, partia e mbështetur nga Putini “Rusia e bashkuar” ka kërkuar me shkrim që të njihet Pavarësia e dy rajoneve në Ukrainë, Donetskut dhe Luhanit. Në këto dy krahina që nga pushtimi i Krimesë kanë filluar luftimet, që nuk janë ndërprerë, ndërmjet separatistëve rus të mbështetur nga Rusia dhe forcave qeveritare të Ukrainës.
Gjatë luftimeve atje kanë humbur jetën rreth 14 mijë veta. Një luftë e re e drejtpërdrejtë me Rusinë, sigurisht se do ta rriste numrin e viktimave jashtëzakonisht shumë.
Sipas agjencisë së lajmeve Rojters, Rusia e Bashkuar, që është partia më e madhe në Dumën e Shtetit, dhe ka 326 deputetë nga 450 sa ka ajo, dëshiron fillimisht të zhvillojë konsultime me Ministritë e Mbrojtjes dhe Punëve të Jashtme, si dhe agjencitë e tjera qeveritare, ndërsa pritet që të martën të kalojë propozimi, sikurse edhe ai i bërë më parë nga Partia Komuniste, për njohjen e sovranitetit të krahinave në fjalë.
Njohja e sovranitetit të dy krahinave të Ukrainës, do të thotë përfshirje e drejtpërdrejtë e Rusisë në luftë me Ukrainën e trazuar.
Rusia tashmë ka lëshuar pasaporta ruse për banorët në rajonet e Ukrainës të kontrolluara nga separatistët.
Shtetet e Bashkuara, Britania e Madhe, dhe shumë vende perëndimore, përfshirë Shqipërinë, kanë vendosur ta tërheqin stafin diplomatik si dhe u kanë bërë thirrje qytetarëve të vendeve të tyre, që brenda 48 orëve ta braktisnin Ukrainën. Kësaj thirrje i është bashkuar së fundi edhe Kosova, që shtetasit tonë që mund të jenë duke jetuar apo punuar atje, apo janë atje për qëllime të ndryshme, ta lëshojnë Ukrainën.
SHBA-të kanë deklaruar përditë, në ditët e shkuara se është çështje kohe pushtimi i Ukrainës, dhe si datë të mundshme e ka shpallur 16 shkurtin. Sipas një relacioni tjetër, SHBA-të parashikojnë sulme raketore, apo kryesisht nga ajri, ndaj Ukrainës nga Rusia.
Në vazhdën e rritjes së tensioneve, të hënën, një zyrtar i lartë ushtarak rus deklaroi se Rusia është e gatshme të qëllojë ndaj anijeve dhe nëndetëseve të huaja që mund të hyjnë ilegalisht në ujërat e saj territoriale.
NATO-ja po vazhdon të vendosë trupa dhe armatime të reja në shtetet e saja anëtare kufitare me Rusinë, duke filluar nga vendet baltike, në Poloni, Rumani, Bullgari etj.
Sipas raportimeve ndërkombëtare dhe dokumentimeve amerikane, si në Krimenë e pushtuar nga Rusia ashtu dhe në krahinën e Donbasit, ukrainasit përballen me shtypje kulturore dhe të identitetit të tyre etnik, janë vënë në një mjedis represiv dhe frikësues. Ndërsa, ata që guxojnë të kundërshtojnë okupimin rus, arrestohen pa asnjë bazë, policia bastis shtëpitë e tyre, torturon dhe abuzon me shumë prej tyre.
Perspektiva shqiptare
Ngjarjet në Ukrainë po nxisin dy zhvillime nga perspektiva shqiptare, ajo e Shqipërisë dhe nga ajo e Kosovës. Kuptohet që perspektiva e zhvillimit të ngjarjeve nga këndvështrimi i Kosovës është më i ndryshëm dhe më kompleks.
Shikuar nga perspektiva e Shqipërisë, kriza e Ukrainës, ka bërë që Shqipëria si anëtare e NATO-s dhe aleate e SHBA-së, të merrë shumë më tepër vëmendje se sa deri më tash, para së gjithash nga pikëpamja gjeostrategjike. Vend me qasje në Mesdhe nëpërmjet detit Adriatik, dhe po ashtu si një vend mesdhetar, nga hapësira e së cilës mund të arrihen caqet edhe në një konflikt të mundshëm Rusi-Ukrainë, dhe për t’i dalë në mbrojtje vendeve të aleancës së NATO-s.
Si duket zhvillimet atje bënë, që SHBA-të ta krijojnë një Shtab të Forcave Speciale në Shqipëri, i gatshëm për të udhëhequr operacione speciale jashtë vendit, në rajon apo edhe më larg.
Ky hap është mirëpritur nga Shqipëria dhe shqiptarët përgjithësisht.
Skenari për Kosovën
Por, Kosova a mund të përfitojë direkt nga kjo krizë?!
Duket se qasja ndaj Kosovës dhe qëndrimeve të institucioneve karshi Serbisë, po gjen më shumë mbështetje, se sa në të kaluarën.
Qasja për njohjen e plotë të sovranitetit dhe të integritetit dhe të respektimit të kushtetutshmërisë së shtetit, ishin qasje të premtuara nga administrata e re presidenciale e SHBA-ve e z.Bajden.
Por, megjithatë me rritjen e tensioneve në Ukrainë, mesazhet që mbështesin politikat aktuale institucionale karshi Serbisë, filluan të jenë më të prera, dhe më të shprehura, në cilësi dhe përsëritje.
Ndërkohë, që Perëndimi po vazhdon ta mbajë afër vetes Serbinë, por gjithnjë me synimin, që atë ta nxjerrë nga ‘kthetrat’ ruse, politikat e saj proruse dhe madje prokineze, kanë filluar të bëhen më transparente.
Serbia është i vetmi shtet në Ballkan, që nuk është shprehur me asgjë për rrezikun e luftës në Ukrainë, të pushtimit rus. Serbia, siç kemi theksuar disa herë është në koordinim të plotë me Rusinë, dhe ka përgatitur plane për invadimin e veriut. Këto plane deri më tash nuk kanë ardhur në shprehje për shkak të vendosmërisë mbrojtëse të Perëndimit për Kosovën, veçanërisht të SHBA-ve.
Por, çka nëse fillon një luftë pushtuese e Rusisë ndaj Ukrainës?!
Kjo luftë do të ishte rraskapitëse për Rusinë. Tashmë ende pa filluar Ukraina ka në zotërim sistemin antiraketor izraelit Javelin, jashtëzakonisht shumë efikas, po ashtu edhe Stingerët amerikanë, por edhe sisteme të tjera kundërajrore, që ndihmojnë kundrejt një sulmi nga ajri.
Zhytja në luftë e Rusisë atje, do ta bënte Serbinë të dobët në marrëdhëniet ndërkombëtare, e mbështetja nga Rusia do ta bënte një shtet të neveritur për Perëndimin. Këto raporte do të reflektonin në krijimin e një situate shumë më të qëndrueshme për Kosovën. Ndërsa, në rast të përpjekjeve serbe për invadim të veriut, shqiptarët do të mund të krijonin një kundërpërgjigje gjithsesi efikase, por edhe do të mund ta shkatërronin sulmin serb, do të kthehej në tmerr për ta, dhe do ta vinin në rrezik forcën e saj ushtarake.
Ky është skenari më optimist dhe të cilin do të duhej ta shfrytëzonin shqiptarët, për t’u shfaqur minimalisht të barabartë me serbët në Ballkan, dhe për të treguar fuqinë e tyre potenciale!
