Liderët e Kinës dhe Bjellorusisë, Xi Jinping dhe Alexander Lukashenko, shprehën një interes jashtëzakonisht të lartë për një zgjidhje paqësore të konfliktit në Ukrainë.
Xi dhe lideri bjellorus Lukashenko, i cili është një aleat i ngushtë i presidentit rus Vladimir Putin, lëshuan një deklaratë pas bisedimeve në Pekin, shkruan BBC, përcjell Fol Drejt.
Lukashenko tha se Bjellorusia “mbështet plotësisht” planin e Pekinit për t’i dhënë fund luftës në Ukrainë.
Kina dhe Bjellorusia “shprehën shqetësim të thellë” për konfliktin dhe treguan “interes jashtëzakonisht të lartë për vendosjen sa më të hershme të paqes në Ukrainë”, njoftoi agjencia shtetërore bjelloruse e lajmeve Belta.
Lukashenko ndihmoi liderin rus në luftën në Ukrainë dhe disa analistë e shohin udhëtimin e tij në Pekin si një shenjë tjetër të afrimit të Kinës me Rusinë dhe aleatët e saj, sipas BBC.
Udhëheqësi bjellorus vlerësoi planin e paqes të Kinës.
Lukashenko tha se ai “mbështet plotësisht iniciativën për sigurinë ndërkombëtare” të paraqitur nga Kina, thanë ndihmësit e presidentit bjellorus.
Udhëheqësi kinez bëri thirrje për refuzimin e “mentalitetit të Luftës së Ftohtë”, sipas një deklarate pas takimit me Lukashenkon.
Xi shtoi se vendet “duhet t’i japin fund politizimit” të ekonomisë botërore dhe “të veprojnë drejt një armëpushimi, një fund të luftës dhe një zgjidhje paqësore” të konfliktit.
Vizita e Lukashenkos në Kinë pasoi përmirësimin e statusit të marrëdhënieve Kinë-Bjellorusi në shtator, disa muaj pas fillimit të luftës në Ukrainë./FolDrejt/
