Presidenti i Francës, Emmanuel Macron, përmes një letre i ka dërguar porosi Maqedonisë së Veriut, ku thotë edhe një herë, vendi ndodhet para një momenti kyç të historisë të saj. Sipas tij, 17 vjet pas marrjes së statusit kandidat, sapo është hapur një mundësi historike: hyrja në fazën aktive të procesit të anëtarësimit në Bashkimin Evropian. “Zgjedhja është e juaja”, shkruan Macron. Më pas shton se është i vetëdijshëm për thellësinë dhe ndjeshmërinë e çështjeve që duhet të zgjidhen mes Maqedonisë së Veriut dhe Bullgarisë, por thotë se nuk ka kursyer aspak përpjekjet për të gjetur një zgjidhje që do të respektonte interesat dhe dinjitetin e secilës palë.
“Në Bullgari, projekt-marrëveshja ishte objekt i debateve intensive. Por në fund, kuvendi bullgar diti të merrte përgjegjësi, me një votim të gjerë dhe mbipartiak. Tani ju takon juve, maqedonasve, të prononcoheni dhe të vendosni. Fuqia për të ndryshuar rrjedhën e historisë tani është në duart tuaja. Nuk do t’ju them se kjo marrëveshje është e përsosur, por ajo do të hap rrugën tuaj evropiane. Si çdo marrëveshje, edhe kjo bazohet në kompromise dhe ekuilibër”, tha Emmanuel Macron, president i Francës.
Presidenti francez siguron se kjo marrëveshje nuk e vë në dyshim ekzistencën zyrtare të gjuhës maqedonase, e cila, siç shkruan, është pjesë përbërëse e identitetit maqedonas. Shprehet po ashtu se Maqedonia e ka merituar respektin e mbarë Evropës. Është fituar dinjiteti si popull maqedonas, i cili, sipas Macron, kurrë nuk do të vihet në dyshim, andaj inkurajon të ndërmerret hapi i ri.
“Në këtë marrëveshje përmendet gjithashtu Marrëveshja e Miqësisë me Bullgarinë e vitit 2017. Ajo garanton zbatimin e duhur të saj, në emër të marrëdhënieve të fqinjësisë së mirë, të cilat bazohen në vlerat evropiane. Së fundi, bëhet fjalë për rishikim të Kushtetutës, me qëllim të integrimit të komuniteteve të reja në të. Vendi juaj tashmë përfaqëson shembullin e bashkëjetesës në Evropë. I mbetet Kuvendit maqedonas që të vendosë”, deklaroi Emmanuel Macron, president i Francës.
Porosinë e përmbyll duke shkruar se ka ardhur koha që gjithsecili të veprojë, me përgjegjësi dhe vlerësim të plotë të peshës dhe pasojave të veprimeve të veta./21Media
