Shkup, Maqedoni (Associated Press) – Në komisionin parlamentar në Maqedoni, të mërkurën ka disur debati për amandamentet kushtetuese, të cilat janë të nevojshme në bazë të marrëveshjes me Greqinë, që mes tjerash përfshin edhe ndryshimin e emrit të shtetit në Maqedonia Veriore, në shkëmbim për anëtarësimin në NATO.
Ky hap vjen pas referendumit të 30 shtatorit pas marrëveshjes me Greqinë, gjë që do ti jepte fund konfliktit pothuajse 30 vjeçar mes dy vendeve fqinje për çështjen e emrit të Maqedonisë.
Votuesit skajshmërisht përkrahën këtë marrëveshje, por referendumi u shpall i pavlefshëm për shkak të pjesëmarrjes së ulët.
Të mërkurën, kryeministri Zoran Zaev u bëri thirrje deputetëve të opozizës, të cilët janë shprehur që do të bllokojnë amandamentet kushtetuese, nuk do të pranojnë ndryshimet, përfshirë edhe modifikimin e preambulës kushtetuese dhe dy neneve. Ai tha që përndryshe Maqedonia nuk do të jetë në gjendje të bashkohet në NATO.
“Të gjithë deputetët kanë një detyrë historike për të hapur rrugën për stabilitetin e vendit, sigurinë dhe prosperitetin ekonomik,” tha Zaev.
Athina për disa vite ka bllokuar hyrjen e Maqedonisë në Nato për shkak të çështjes së emrit, duke argumentuar që emri i tanishëm i vendit nënkupton pretendime mbi territorin dhe trashëgiminë greke.
Koalicionit qeverisës të majtë të Zaevit i mungon shumica e dy të tretave që i nevojiten për të miratuar propozimet dhe ai ka thënë që do të bëj thirrje për zgjedhje të parakohshme nëse refuzohen amandamentet.
Por partia kryesore e opozitës konservatore VMRO- DPMNE, këmbëngul që marrëveshja me Greqinë është e “vdekur” pas referendumit.
“Njerëzit kanë refuzuar marrëveshjen,” tha deputeti i VMRO-DPMNE, Trajko Veljanoski. “Unë nuk do të votoj për ndryshime kushtetuese.”
Debati do të vazhdojë për disa ditë në nivel të komisioneve, përpara se deputetët të nisin seanca plenare, që ndoshta do të ndodhin në javën në vazhdim.
Parlamenti i Maqedonisë ka ratifikuar marrëveshjen për ndryshimin e emrit, e cila do të finalizohet vetëm nëse vendi ndryshom kushtetutën dhe nëse parlamenti Grek gjithashtu ratifikon marrëveshjen.
