Rrjeti OnePath udhëtoi deri në Queensland të Veriut për t’u takuar me Komunitetin shqiptar musliman të Mareeba.
Ata janë një komunitet i vogël rural i fermerëve shqiptarë që janë këtu që më shumë se 100 vjet.
Ne zbuluam se si ata jo vetëm që ishin në gjendje të bëheshin pjesë kaq natyrshëm në kulturën australiane, por edhe sekretin që qëndron pas aftësisë së tyre për të mbijetuar për kaq shumë breza.
“Unë do t’ju marr në një udhëtim në veriun e Australisë, përkatësisht në Mariba. Aty jeton komuniteti më i vjetër dhe që më së gjati ka mbijetuar i muslimanëve, për të cilën nuk di thuajse askush”, thuhet në OnePathNetwork, përcjell Fol Drejt.
Ai aty shpjegon se si u prit nga udhëheqësi i guidës që do ta shoqërojë, e që është një shqiptar i quajtur Samir.
“Ata janë muslimanë që jetojnë në Mareba, por që me prejardhje janë nga Shqipëria”, thuhet tutje në video.
Përfaqësuesi i OnePath Network, u takua me Plum Murat, shqiptari i cili ka nën udhëheqje një plantacion me kafe, të trashëguar nga i ati. Tani kompania e tyre “Jack Murat” prodhon dhe shet kafen që e kultivon. Aty i biri i Jack, tregon se ky është emri i tij në Australi por në fakt emri i vërtetë i babit të tij është Humet Murat.
Jack Murat udhëtoi për në Australi në vitin 1929, duke u larguar nga lufta e cila ishte duke ndodhur në Shqipëri. Sapo u zhvendos në Australi ai punoi fort, derisa u bë edhe një nga pronarët e prodhuesit të kafes në kompaninë e cila tashmë ka mbushur 60 vjet që nga themelimi.
Kjo kompani tani udhëhiqet nga pasardhësit e tij, përfshirë këtu djalin por edhe pjesëtarë të tjerë të familjes Murat. Në video shfaqet edhe Iskander Murat një nga vëllezërit e Plum Murat, i cili është edhe udhëheqës i një ferme lopësh. Aty kultivohen kallami i sheqerit e bananet.
Anëtari tjetër i familjes është Abdul Rahim, i cili bashkë me gruan e tij Heather flasin për historinë e familjes së tyre.
“Ne kemi pasur gjyshin e Abdul Rahim, vajzat tona dhe së fundmi e kemi edhe një nip, pothuajse gjashtë gjenerata”, shprehet Heather.
Më i riu nga vëllezërit Murat, Benyamin Murat, sqaron se si arritën që pas kaq shumë kohësh në Australi, ta ruajnë identitetin e tyre fetar, musliman.
Kopshti i tij i mbushur me lule shpjegon meditimin që e ka ai me veprën e Allahut në tokë, këtu ai përmend ngjyrat e format e ndryshme por gjithashtu shumë të veçanta të luleve.
“Ti e sheh Allahun kudo që shkon”, thotë ai, në kuptimin e veprës që Allahu e ka krijuar në tokë.
“Islami është pjesë e natyrës së të jetuarit”, thotë tutje Benyamin.
Ata e sqarojnë lidhjen e besimit të tyre me punën të cilën e bëjnë duke theksuar se në rast të përfitimit ose jo nga puna që bëjnë, ata janë gjithnjë të kënaqur, kjo ngaqë Allahu e di më së miri pse diçka ka ndodhur ose jo.
Imami i xhamisë në Mariba, thekson se Allahu nuk shikon të jashtmen por brendësinë, zemrën e njeriut, në atë se çfarë ka në të. Duke folur në veçanti për familjen Murat, ai tha se lidhja e tyre me islamin është shumë e thellë.
“Islami këtu është zhvilluar natyrshëm”, shprehet imami Ibrahim Abdullah.
Parimi i tyre është të jesh 100% i vërtetë në atë që e bën, në kuptimin që përkushtimi të jetë me tërë qenien.
Hasim Selita thotë se gjykimi për shqiptarët, e shqiptarët muslimanë në veçanti, ka një qasje shumë pozitive, në një formë kjo tregon që në atë çështje nuk do të ketë probleme, në aspektin e bashkëpunimit besnik ndërmjet tyre.
“Ne kemi një imazh shumë të mirë këtu”, shprehet ai.
Kryetarja e Maribas, Angela Topin, thotë se ka një lidhje të veçantë me familjen Murat, lidhje kjo e trashëguar nga prindërit e saj.
“Ata e respektuan njëri-tjetrin dhe ky respekt po vazhdon edhe sot”, u shpreh Topin.
Vëllezërit Murat gjithashtu e shpjeguan edhe historinë e xhamisë, të cilën e projektoi një arkitekt jo musliman, në vitin 1969, Tom Roy.
“Kjo xhami është e treta e ndërtuar në Australi, unë madje jam martuar në këtë xhami”, thotë Haji Selita.
Kjo duket ana e mirë e medaljes, por ata në fillim hasën vështirësi të shumta, e para si të huaj në Australi e pastaj si muslimanë.
“Këtu asgjë nuk ishte origjinale, nuk agjëronte askush, nuk falej xhumaja, nuk falte namaz askush”, shprehet Heather.
“Patëm përballje të shumta por Elhamdulilah, fituam”, thotë tutje ajo.
Ata flasin tutje duke e bërë edhe më inspiruese historinë e tyre, se tashmë pasardhësit e tyre shkojnë në klasë për të mësuar islamin dhe kjo ju jep shpresë atyre që tradita fetare të ruhet e investimi i tyre të mos shkojë dëm.
“Kjo është diçka që unë nuk e kam pritur të ndodhë, por Allahu është i madh”, thotë Benyamin.
Dikur Davidi e tani Dawudi, u konvertua në islam dhe po vazhdon jetën që 50 vjet si musliman, shprehet i kënaqur duke thënë se E tërë jeta ime tani është për Zotin.
Në Mariba sot jetojnë 80 familje muslimane, në mesin e tyre shumë të konvertuar.
KËTU mund ta gjeni videon e plotë në gjuhën angleze.
Përktheu: Zamira Rexhepaj Mehmetaj, Fol Drejt.
