Shkruan: Prof. Dr. Agni Dika
• Askush nuk është kundër dialogut dhe marrëveshjes historike me Serbinë, duke i kthyer në përbërje të Kosovës Preshevën, Bujanovcin dhe Medvegjen. Por, aktualisht bashkimi i këtyre territoreve me Kosovën nuk mund të bëhet përmes bisedimeve, kur dihet rëndësia strategjike e korridorit rrugor veri-jug, i cili kalon pranë tyre.
• Nga historia e përgjakshme qindravjeçare nëpër të cilën kemi kaluar me Serbinë, është e qartë se përmes bisedimeve do të kemi vetëm humbje. Fitorja më e madhe e këtyre bisedimeve për ne do të ishte nëse ruhen kufijtë ekzistues, të cilët Kosova i kishte si njësi përbërëse e Federatës Jugosllave, pastaj të njëjtit u konfirmuan nga Gjykata Ndërkombëtare e Hagës, si dhe përmes Planit të Ahtisarit.
• Taksa 100%, e cila u imponua nga veprimet tejet destruktive të Serbisë kundër zhvillimit të lirë të Kosovës dhe njohjeve ndërkombëtare të shtetësisë dhe institucioneve të saj, ishte një hap i vonuar por i duhur.
• Kërkesës për heqjen e taksës është dashur t’i kundërvihemi duke kërkuar prej Serbisë që:
– Kosova të mos figuroje në Kushtetutën e saj si pjesë përbërëse;
– të kërkojë falje për krimet e luftës ndaj popullatës civile: vrasjen e mbi 15 mijë civilëve (shumica e të cilëve ishin gra, fëmijë dhe pleq), dhunimet, dëbimin nga shtëpitë e tyre i rreth një milion qytetarëve të Kosovës, mijëra të zhdukurve, fshehjen e kufomave të të vrarëve nëpër varrezat masive kudo nëpër Serbi, ose hedhjen e tyre në furrat e shkritoreve;
– t’i heqë kufizimet e ndryshme administrative ndaj eksportit të produkteve kosovare, lëvizjen e lirë të mallrave dhe mjeteve transportues;
– të lejojë funksionalizimin e largpërçuesit 400 KV, i ndërtuar me donacion Gjerman, për lidhje të Kosovës dhe Shqipërisë në rrjetin energjetik Evropian;
• Kushtëzimet nuk do të ndalen vetëm me taksën. Serbia sigurisht se do të kërkojë anulimin e vendimit për formimin e Ushtrisë së Kosovës, vendosjen e statusit special për pjesët e banuara me serbe (jo vetëm të tre komunave në Veri të Kosovës), pastaj marrjen e Trepçës, liqenit të Ujëmanit, si dhe me shumëçka tjetër, gjithnjë me qëllim të pengimit të funksionimit normal të shtetit të Kosovës, marrjes së pasurive natyrore dhe copëtimit të plotë të saj.
• Duke i zgjatur bisedimet vite me radhë, sipas diktatit të tyre, Serbisë i është mundësuar vazhdimi i hapjes së shumë kapitujve në rrugën e saj drejt anëtarësimin në BE, si rezultat i së cilëve janë marrë ndihma të konsiderueshme financiare.
• Është koha që ta kemi të qartë se parakusht për përballje serioze me Serbinë është unifikimi i qëndrimeve brenda faktorit politik shqiptar. Janë të pa tolerueshme qëndrimet e partive politike, ose individëve brenda tyre, të cilët shihet qartë se ndërlidhen me interesa të ngushta partiake, duke mos i marrë parasysh dëmet që i shkaktohen vendit tonë.
