Lëvizja Vetëvendosje ka njoftuar se sot është mbajtur mbledhja e dytë e organizatës Gratë për VETËVENDOSJE!, ku janë inkurajuar dhe mbështetur organizimi i grave gjithandej vendit, raporton Fol Drejt.
“GVV organizatë që inkurajon dhe mbështet organizimin e grave gjithandej vendit!
Lëvizja VETËVENDOSJE! ka bërë progres të rëndësishëm në fuqizimin e vajzave dhe grave brenda organizatës dhe në shoqëri. GVV me gjithë sfidat që ka një organizatë e re për ditë e më shumë po bëhet më e njohur publikisht si një forcë e rëndësishme në promovimin e të drejtave të grave dhe të barazisë gjinore. Pas një punë të suksesshme për ngritjen e numrit të grave deputete, ngritjen e numrit të grave ministre, na pret punë ta rrisim edhe numrin e grave kryetare nëpër qytetet e Republikës tonë.”, shkruan në komunikatën zyrtare.
“Këto ishin vijat e trasha të kësaj mbledhje të II të organizatës Gratë për VETËVENDOSJE!, ku u fol për dokumente të rëndësishme si Manifesti i GVV-së, llogoja, dhe grupi për ndryshimin e rregullores së kësaj organizate.
Në fillim të mbledhjes, delegateve ju drejtua për një fjalë rasti Kryetarja e GVV-së, njëherazi ministrja e Drejtësisë, Albulena Haxhiu.”, thuhet tutje aty.
Kryetarja Haxhiu i bëri një përmbledhje punëve që janë bërë që nga themelimi i kësaj organizate.
“Nga janari i këtij viti në secilën qendër të GVV është punuar në planet e punës, në buxhetimin e aktiviteteve ndërsa vetëm përgjatë muajit mars kishim 50 aktivitete gjithandej vendit. Jemi takuar me shoqata dhe organizata që angazhohen për të drejta të grave, dhe me gra që udhëheqin dhe kanë ngritur biznese. Kemi vizituar familjet e grave dëshmore, për të treguar dhe lartësuar respektin që kemi për kontributin e tyre në luftë por kemi takuar edhe gratë që gjatë luftës kanë humbur bashkëshortët e tyre për t’ju përkulur qëndrueshmërisë edhe pas dhimbjes së madhe që i ka përcjellë ndër vite”, tha Kryetarja Haxhiu.
Përmes këtyre takimeve, ajo tha që kemi kuptuar shumë gjëra dhe më pas i kemi adresuar ato edhe si qeveri.
“Duke e konsideruar mungesën e punësimit te gratë një nga problemet kryesore që e ndalë përparimin e grave vetëm vitin e kaluar me masat e ndërmarra nga qeveria janë punësuar 5 mijë gra. Ato po ashtu janë mbështetur me shtesa pas lindjes e me shtesa për fëmijë. Për herë të parë një qeveri kthen kokën për ata që kanë më së shumti nevojë. Janë mbështetur bizneset e grave dhe ka pasë angazhim në mbrojtjen e të drejtave të punëtorëve.”
Tutje ajo foli edhe për rëndësinë e shtimit të anëtarësisë dhe për rëndësinë e punës në nivelin lokal, në organizimin e grave nëpër qendrat e Lëvizjes VETËVENDOSJE!.
Pas saj, fjalën e mori Kryetari i Lëvizjes, njëherazi Kryeministri, Albin Kurti, i cili theksoi nevojën e punës për më shumë kryetare gra nëpër komuna tona. Sipas tij, kemi ecur mirë me gra deputete në Kuvend, e po ashtu edhe në Qeveri, tash radhën e ka përgatitja për më shumë gra kryetare nëpër komuna.
“Nga zgjedhjet e 14 shkurtit 2021, grupi parlamentar i LVV-së doli me 23 gra deputete apo 40%. 23 gra nga 58 deputetë sa pati grupi ynë parlamentar i Lëvizjes VETËVENDOSJE! nga zgjedhjet historike të 14 shkurtit 2021. Dhe asnjëra prej këtyre 23 grave nuk u bë deputete duke ju falënderuar kuotës. Asnjëra. 23 gra me punën, kontributin, reputacionin e vet atyre. Në Qeveri i kemi 5 gra ministre dhe unë si Kryeministër i kam dy zëvendëskryeministre. Kemi ecur shumë para me deputete në Kuvend, e ministre në Qeveri, e tash është radha që të përgatitemi qysh sot, që pas dy vitesh të kemi shumë kryetare gra nëpër komuna.”
“Angazhimi ynë duhet të jetë poshtë, në Komuna. Jo vetëm sepse në komuna bëhemi lart, edhe më lart. Lëvizja VETËVENDOSJE! i ka 6 kryetarë të komunave që të gjithë burra. Andaj, është e domosdoshme që në zgjedhjet e radhës kjo të ndryshojë. Jo në zgjedhjet pas atyre që vijnë, por atyre që vijnë. GVV-ja dhe gjithë ne së bashku duhet të angazhohemi qysh tani që në zgjedhjet e ardhshme 30%-shi t’i përket të kaluarës edhe në Kuvende Komunale, edhe me kryetare të Komunave”, tha Kryetari Kurti.
