Nën udhëheqjen e kryeministrit Kurti, sot u mbajt mbledhja e Komitetit për Kompleksin Memorial “Adem Jashari” në Prekaz.
Komisioni i ekspertëve të formuar në fillim të këtij viti prezantuan dhe diskutuan pikat bosht mbi të cilat do të shtjellohet koncepti e vizioni për Master Planin, shkruan AA, transmeton Fol Drejt.
Kjo mbledhje ishte vetëm një hap drejt fazës së ardhme që ka për qëllim kryesor shpalljen e konkursit për hartimin e Master Planit për këtë Kompleks.
“Gjatë vitit të kaluar kemi ndërmarrë hapa për t’u siguruar që të konsolidohet gjendja fizike e ndërtesave në Kompleks dhe përmes vlerësimeve profesionale dhe ndërhyrjeve emergjente të realizuara, gjendja e sigurisë së ndërtesave të rrezikuara brenda kompleksit është përmirësuar” u shpreh Kurti.
“Ky rrëfim duhet të bëhet i ditur për të gjithë, për të rinjtë edhe të rejat, për ata që do vijnë pas nesh dhe për çdo të huaj që e viziton vendin tonë. Duhet të tejkalojmë edhe barrierat kohore, dhe kujtimin për veprën heroike të Familjes Jashari ta shndërrojmë në përjetësi, sepse është një ngjarje unike me efekte të cilat do të shtrihet edhe kur ne nuk do të jemi më”, u shpreh më tej kreu i ekzekutivit.
Ai shtoi se Kompleksi Memorial “Adem Jashari” është një nga proceset më delikate të Republikës së Kosovës, dhe “për atë jemi siguruar të punojmë me një ndjeshmëri dhe përgjegjësi të lartë, me qasje profesionale e multi-diciplinare, nga historia, monumentaliteti, peizazhi kulturor e natyror, deri te vlerësimi profesional teknik dhe kujtesa kolektive”. /FolDrejt/
