Mbi 2600 institucione arsimore janë dëmtuar dhe 406 janë shkatërruar plotësisht që nga fillimi i pushtimit rus në shkallë të gjerë, tha zëvendësministri i parë i Arsimit dhe Shkencës Andrii Vitrenko, raporton Ukrinform, përcjell Fol Drejt.
“Kemi pësuar humbje të konsiderueshme në infrastrukturën arsimore që janë duke u vlerësuar. Mbi 2,600 institucione arsimore u dëmtuan dhe 406 u shkatërruan plotësisht”, tha Vitrenko.
Sipas Ministrisë së Arsimit dhe Shkencës të Ukrainës, gjithsej 12,902 shkolla tani funksionojnë brenda territorit të kontrolluar nga Ukraina.
Gjithsej 516,000 fëmijë të moshës shkollore po qëndrojnë jashtë territorit të Ukrainës. Më herët kjo shifër ishte 620 mijë.
“Ne jemi të kënaqur që më shumë se 100,000 fëmijë janë kthyer tashmë në Ukrainë dhe në sistemin arsimor kombëtar të Ukrainës,” vuri në dukje Vitrenko, duke shtuar se rreth 95,000 fëmijë të moshës shkollore kanë mbetur brenda zonave të pushtuara përkohësisht.
Vitrenko përmendi gjithashtu se Ukraina është i vetmi vend që nuk e ka ndalur procesin arsimor mes armiqësive aktive. Tani, gjithsej 4,967 shkolla në Ukrainë funksionojnë online. /FolDrejt/
